Идел елгасында баткан көймәнең 8 пассажирын тапканнар, алты айлык бала һәлак булган
Чувашиядә начар һава шартлары Идел елгасында бәхетсезлеккә сәбәп булган. 29 июльдә 20.30 сәгатьтә көчле яшен вакытында сулыкта җиңел моторлы катер әйләнеп капланган һәм баткан.
Ул Амоксар утравыннан уң як ярга, Чабаксар округының Адылъял авылы ягына йөзгән булган. Якынча мәгълүматлар буенча, 5 пассажирга исәпләнгән судно бортында 10 кеше булган, шул исәптән 6 бала.
Россия Гадәттән тыш хәлләр министрлыгының Чувашия буенча Баш идарәсе матбугат хезмәте хәбәр иткәнчә, көймәнең двигателе сүнгән һәм көчле җил аркасында күтәрелгән биек дулкын аны аударган дип фаразлана. Кешеләр суда калган, ә коткару жилетлары яртысында гына булган.
Бәлага таручыларга Россия Гадәттән тыш хәлләр министрлыгының Кече суднолар буенча дәүләт инспекциясе экипажлары, коткаручылар һәм транспорт полициясе җибәрелгән. Эзләү операциясе төне буе катлаулы һава шартларында үткәрелгән. Ашыгыч хезмәтләрдә эшләүчеләр, бу районда булган балыкчылар ярдәме белән, әйләнеп капланган катердагы 8 кешене тапкан. Кызганычка, 6 айлык бала һәлак булган. Тагын 4 балигъ булмаган бала Чабаксар шәһәре хастаханәсенә озатылган.
Хәзерге вакытта гадәттән тыш хәл урынында эзләнүләр дәвам итә. Коткаручылар судно белән идарә иткән 34 яшьлек йөртүчене һәм 8 яшьлек пассажирны эзли.
Тулырак: https://tatar-inform.tatar/news/idel-elgasynda-batkan-koimanen-8-passaziryn-tapkannar-alty-ailyk-bala-halak-bulgan-5874333
Следите за самым важным и интересным в Telegram-каналеТатмедиа
Нет комментариев