Камал театры 25 ел элек тамашачы йөрмәгән спектаклен видеодан күрсәтте

Камал театры 25 ел элек тамашачы йөрмәгән спектаклен видеодан күрсәтте. Шекспирның “Ромео һәм Джульетта” спектаклен 29 яшьлек Фәрит Бикчәнтәев 1991 елда чыгарган.

Спектакльне театрның “Камал мәктәбе” проекты кысаларында күрсәттеләр.

Искәртеп үтәбез, "Камал мәктәбе" театр тамашачысы мәктәбе - Г.Камал исемендәге Татар дәүләт Академия театрының белем бирү проекты. Сәнгатьнең һәр юнәлешен тарихи, социаль, сәяси һәм әхлакый контекстсыз күз алдына китерү мөмкин түгел. Мәктәптә оештыручылар Камал театрының легендар спектакльләрен лекторий, бәхәс, мастер-класс, ток-шоу һ.б. форматларда күрсәтеп, әлеге контекстны тамашачылар һәм экспертлар ярдәмендә аңлатырга тырыша.

“Ромео һәм Джульетта” – Капулетти һәм Монтекки гаиләләренең каршылыгы аркасында барлыкка килгән трагедия. Гаилә башлыкларын Әзһәр Шакиров белән Наил Дунаев башкара. Төп рольләрдә - Люция Хәмитова белән Илдус Габдрахманов.

Театрның Кече залында “Ромео һәм Джульетта”ны тамашачы белән бергә анда уйнаган артистлар һәм театр тәнкыйтьчеләре карады. Артистлар – Наилә Гәрәева, Әзһәр Шакиров, Ренат Таҗетдиновлар бу спектакльне куйган режиссерга рәхмәтләрен җиткерделәр. Наил Дунаев видеодан тавышның сыйфатсыз яңгыравына зарланды.

Тәрҗемәче Илдус Әхмәтҗанов тәрҗемә итүдән тыш сәхнә теле буенча артистлар белән ничек эшләвен дә сөйләде.

Тәнкыйтьчеләр спектакльнең туксанынчы елларда куелуына басып ясады. Нияз Игъламов бу спектакльнең үзен театрга китерүен әйтте. “Сез, яшьләр, моны белмисез, - дип залга мөрәҗәгать итте ул. – Монда урам хисе, группировкалар хисе сизелә. Мин бу яшь геройларга гашыйк идем. Мин әти белән премьерага бармый идем. “Туйган сезнең колхоз тарихларыннан”, - дия идем. Мине “Илгизәр+Вера”лар туйдырды. Мин ул шартларда үсмәдем. Монда режиссер безнең Казан тарихын күз алдына китерә. Бу спектакль минем яшьтәшләр турында зур тарихны сәхнәгә чыгарды. Минемчә, бу Фәрит Бикчәнтәевнең иң шәп спектакльләреннән берсе”.

Театр белгече Елена Шевченко Ромео һәм Джульеттаны заманча тинейджерлар белән чагыштырды.

“Без бу әсәрне өйрәнгәндә мәхәббәт кыйссасын һәм ике гаилә ызгышын үзәккә куя идек. Монда ике режиссер дискуссиясен дип күрәм. Тавышсыз бәхәс. Монда мәхәббәт артта кала. Монда ике эстетика. Яңа режиссер театрга үз эстетикасы белән керә, яңа алымнар керә”, - диде Миләүшә Хәбетдинова.

Оештыручылар әйтүенчә, спектакль дүрт-биш ел чамасы барган. Экспертлар һәм артистлар тамашачы өчен легендар булып калмаган бу спектакльнең ни өчен проектка кертелүен аңлатмадылар. Ни өчен тамашачы йөрмәве дә фикер алышу үзәгенә әверелмәде.  

Фото: https://kamalteatr.ru/

http://tatar-inform.tatar