Бала сәламәтлеген кем кайгырта?

Дәүләт Советының “Мәр­хәмәт” хатын-кыз депутатлары оешмасы, республиканың белем бирү учреждениеләре җитәкчеләре, табиблар, бел­гечләр Казан дәүләт медицина университетына җыелды. Алар биредә балалар сәла­мәт­леге турында сөйләште. Татарстан депутатлары һәм табиблары утырышта Россия укучыларын махсус медицина тикшеренүе уздырырга тәкъдим иттеләр һәм Хөкү­мәткә шундый тәкъдим юлладылар.
– 10-11 нче сыйныф укучылары мәктәптән күп кенә авырулар белән чыга. Беренче урында – нерв системасы һәм психологик өлкә, аннан терәк-хәрәкәт аппараты һәм өченче урында йөрәк-кан тамырлары патологиясе тора. Күз күрү проблемасы да бар. Ашкайнату системасы авырулары да күп очрый, – диде Казан дәүләт медицина университетында узган очрашуда “Балалар сәламәтлегенең милли медицина тикшере­нү үзәге”нең фәнни эшләр буенча директор урынбасары, профессор Владислав Кучма.

– Россия Дәүләт Думасында мәктәптә сәламәтлек­не сак­лау эшенә кагылышлы аерым документларга үзгә­решләр кертү турындагы закон проекты карала. Бүген лицензияле медицина кабинеты һәр мәктәптә дә юк. Моның өчен шартлар да җитәрлек түгел. Бу мәсьәләне хәл итү юлларын уйларга кирәк, – ди Татарстан Дәүләт Советы Рәисе урынбасары, “Мәрхә­мәт” ха­тын-кыз депутат­лар бер­­­ләшмәсе җитәкче­се Татья­на Ларионова. – Физкультура дәресләрендә балаларны югалтабыз. Бу – алар­ның физик яктан әзер булмавын һәм укытучылар­ның хаталарын да күрсәтә. “Ашыгыч ярдәм“ килеп тә җитмәскә мөмкин. Шуңа күрә мәктәп­ләрдә беренче ярдәм күрсәтә торган кабинетлар булуы, педагог­лар­ның һәр вәз­гыять­кә дә әзер булуын кайгыртырга кирәк. Бала сәламәтлеге турында сүз барганда без барыбыз да бер­ләшергә тиеш. Укытучылар да, табиблар да, әти-әниләр дә. Мәсәлән, юри генә, иртән балагыз белән күнегү­ләр ясый­сызмы, дип сорасам да, берегез дә уңай җавап бир­мәячәк. Без әле никтер бу хакта уйлап бетермибез.

Балаларның сәламәтле­ге – ул безнең киләчәк хакында сөйли, ди депутат ханым. Шунлыктан республикада мәк­тәпләр төзелүгә зур игътибар бирелә. Узган ел Татарстанда 29 урта белем бирү һәм 7 коррекция мәк­тәбе төзекләндерелгән. Алты яңа­сын салганнар. Быел беренче сентябрьгә 12 яңа мәктәп үз ишекләрен ачар дип көтелә. Шулай ук 16 урта һәм 11 кадет мәк­тәбе яңар­тыла. Җәйге лагерьлар, яшүс­мерләр клублары һәм балалар хас­таханә­ләре ел саен төзек­ләндерелә.

– Физик яктан сәламәт­лекне генә түгел, психологик якны да онытмаска кирәк, – ди Ларионова. Владислав Кучма сүзләренә караганда, Рос­сиядә мәктәп укучыла­рының бары тик 20-30 процентына гына уку ошый. Безнең илдә дә башка балаларны укымас­ка котырту га­дәте киң таралган икән. Мәк­тәп укучы­лары­ның бер-бер­сенә карата мәр­хәмәт­сезлеге, аерым очрак­ларда кансызлыгы те­ләсә кайсыбызны уйланырга мәҗ­бүр итә.

– Хәзер барыбыз да интернетта “яши”. Олылар да, балалар да – мәгълүмати мәйданда. Моннан куркып утырып булмый, ләкин мо­ңа дөрес юнәлеш би­рергә ки­рәк, – ди Татарстан премьер-министр урынбасары Ләйлә Фазлыева. – Рес­публикада балаларны ки­рәкмәс мәгъ­лүмат­т­ан яклау буенча педагоглар һәм медицина университеты га­лим­нәре белән бер­лектә күп кенә программалар эш­ләнде. Әйтик, әти-әниләр өчен интернетта җые­лыш­лар уздыру үзенең кирәк­леген исбатлады. Шундый бер очрашу нәкъ менә социаль челтәр­ләргә кагылышлы иде.

Әлеге очрашудан соң резолюция кабул иттеләр. Анда, мәктәп укучы­лары­ның сәла­мәт­леген кайгырту, “Сә­ламәт гаилә” бәйгесе булдыру, педагогларны әзер­­ләү, республикада сә­ламәтлекне саклау буенча бер система булдырырга, дигән фикергә килделәр. Шәт, планлаш­ты­рылган­нар­ның бер өлеше генә булса да тормышка ашмый калмас.

Фото: https://pixabay.com | Romagna21

http://www.vatantat.ru