Бер чиктән – икенчесенә... Укытучыларны әти-әниләр белән аралашудан ник тыялар?

Эш шунда: быел улым беренче сыйныфка укырга керде һәм мине ата-аналар комитетына сайлап куйдылар. Мә­шә­кате күп булганын белсәм дә, карышып маташмадым. Укы­тучыбызга да,  улымның сыйныфташларына да чын күңелдән ярдәм итәсе килде. Әлбәттә инде, беренче көн­нән үк бөтен аралашу социаль челтәрләр аша башланды. WhatsAppта үз төркеме­безне төзедек. Берне түгел, икене. Берсе әти-әниләр өчен генә, икенчесендә укытучыбыз да катнаша. Бу минем өчен яңалык түгел. Балалар бакчасында да безнең үз төрке­мебез бар иде. Тәрбиячебез хәтта балаларыбызны фотоларга төшереп, безне эшләгән эшләре белән таныштырып барды. Моның өчен без аңа бик рәхмәтле булдык.

Мәктәптә баласы укыган кеше аңлыйдыр, бигрәк тә беренче сыйныфта  вак-төяк проблемалар гел чыгып кына тора. Ә хәзерге вакытта аларны социаль челтәрләрдән башка ничек хәл итәсең? Сыйныфта – 32 бала. Димәк, 32 ата-ана белән турыдан-туры аралашырга кирәк. Ярый, хәл итәселәрне укытучы ата-ана­лар комитетына җит­керде, ди. Без дә аның үтене­чен,  йә хәбәрен укытучы катнашмый торган төркемебезгә куя  алабыз. Әмма бу инде укытучы сүзе түгел бит.

Мәгълүмат чараларыннан күрен­гәнчә, мәгариф ида­рәсеннән мәктәп­ләргә җи­бәрелгән бу тәкъдимнең нигезендә “мәгълүматны бо­зудан һәм аңлашыл­­маучы­лыклардан саклану өчен” дигән сылтама ята.

Ата-аналар фикеренчә исә, түрәләр акча җыю һәм башка тәртип бозу күренешләренең социаль челтәрләр аша дөньяга чыгуыннан курка. Күрәсең, бүген һәр балада диярлек диктофон да, видеокамера да бар икәнен “онытып җибәргән­нәрдер”. Иманым камил, кыек эшләрне фаш итәргә теләгән бала әллә нинди ысуллар таба ала. Шуңа күрә дә бу тәкъдим тәвә кошының башын комга тыгып качырга тырышуы кебек кенә тоела. Без, гадәттәгечә, бер чиктән икенче чиккә сикерергә яратабыз шул. Дөрес, соңгы араларда булган кайбер очраклардан соң уйланырга, бу проблеманы хәл итәргә кирәк анысы. Әмма мәгариф идарәсеннән җибәрел­гән тәкъдим­нәр­дә укытучыларны саг­рак булырга өндәү дөресрәк булмас идеме икән?

Хәтерегездәдер, ике ел элек элеккеге мәгариф идарәсе начальнигы, бү­генге ТР мәгариф һәм фән министры­ның беренче урынбасары Илсур Һадиуллин да бу мәсьәләгә кагылган иде. Ул да мәктәп һәм балалар бакчалары җитәк­челегенә шуңа охшаш тәкъдимнәр бе­лән чыкты. Анда социаль челтәр­ләрдә аралашудан баш тарту гына түгел, ә бәлки, эш вакытында, дәрес­ләрдә балаларга да, укытучыларга да телефонны бөтенләй кулланмаска тәкъдим ител­гән, чөнки мәктәпләрдә ул уку-укыту процессына комачаулый, ә тәрбияче­ләр, сөйләшү белән мавыгып китеп, сабыйларны күз уңыннан ычкындырырга мөмкиннәр, диелгән иде. Әмма ул вакытта да бу күрсәтмәгә караш төр­лечә булды. Берәүләр яклап чыктылар, икенчеләр кеше хокукларын бозу дип атадылар. Хәзер дә, интернеттагы аң­лат­малардан күренгәнчә, ата-аналар­ның фикере бик төрле. Әмма күбесе укытучы белән ата-аналар арасындагы аралашу юлын бөтенләйгә ябып куюга, “ябык мәктәпләр” ясауга каршы. Димәк, бу өлкәдә дә җиде кат үлчәргә, бер кат кына кисәргә кирәк.

Фото: https://pixabay.com | Pexels

http://www.vatantat.ru