Июль аенда Татарстанда сәүдә үзәкләре ачылу мөмкин булачак вакытны әйтәчәкләр

Татарстан Covid-19 коронавирусы пандемиясе белән бәйле чикләүләрне бетерүнең икенче этабына күчәргә әзер. Әмма сәүдә үзәкләрен ачу өчен республика өченче этапта булырга тиеш, ә яңа йомшартуларга күчү датасы 1 июльдән дә иртәрәк билгеле булмаячак. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина сөйләде.

«Сәүдә үзәкләре өченче этапта ачыла, без хәзер икенче этапка якынлаштык: таралу коэффициенты [коронавирус] бездә 0,8, койкалар тулылыгы — 50 проценттан артык түгел, ә тест үткәрү 100 мең кешегә 110 кеше. Бүгенге көндә күрсәткечләр икенче этапка туры килә. Икенче этапны килештерү [чикләүләрне бетерү] Роспотребнадзорда алып барыла, һәм әгәр ул булса, без инде икенче этапка күчәчәкбез», — дип аңлатты спикер.

Шул ук вакытта чикләүләрне бетерүнең өченче этабына авыру таралу коэффициенты 0,5 процентка кадәр кимергә, буш койкалар 50 проценттан да ким булмаска, ә тестлаштыру күрсәткече 100 мең кешегә 120гә җитәргә тиеш.

Республика кулланучылар хокукларын яклау һәм кеше иминлеге өлкәсендә күзәтчелек федераль хезмәте җитәкчесе урынбасары искәртеп узганча, чикләүләрне бетерүнең беренче этабына Татарстан 1 июньдә күчте, ә 18 июньдә икенче этапка якынлашкан. «Күрсәткечләр тотрыклы булсын өчен, ким дигәндә, ике атна мониторинг кирәк», — диде ул.

Шуңа бәйле рәвештә, Авдонина июль башына гына республиканың чикләүләрне бетерүнең өченче этабына күчәргә әзерлеген бәяләргә мөмкин булачак, дип белдерде.

Сәүдә үзәкләре ачылганнан соң, аларның бүлмәләрендә социаль дистанция сакланырга тиеш, кулларны антисептик белән эшкәртү өчен урыннар булдырырга кирәк булачак. Килүчеләр битлек һәм перчаткалар киеп йөрергә, ә хезмәткәрләр температураны үлчәтергә тиеш булачак.

Элегрәк «Татар-информ» мәгълүмат агентлыгы хәбәр иткәнчә, Татарстанда Сабантуйларны коронавирус таралуга бәйле тотрыклы вазгыять булган районнарда гына үткәрергә планлаштыралар. 

Фото: архив/Владимир Васильев

Чыганак: tatar-inform.tatar