Казан кунаклары бүләккә 5 кг казылык ала алачак

“Туризмны үстерү комитеты” муниципаль бюджет оешмасы директоры Дарья Санникова Казанга яңа ел бәйрәмнәренә башка шәһәрдән килгән туристлар арасыннан очраклы бер бәхетлесен сайлап, 5 кг казылык белән бүләкләргә вәгъдә бирде. Милли ризык ат итеннән эшләнә.

“1 гыйнвардан инстаграмм-пабликта togoКазан акциясе башланып китә. Анда казанлылар башка шәһәрләрдән дусларын чакырып, фестиваль ["КышДаКар фест“ — Т-и. иск] фонында фотога төшәргә һәм "кышдакарфест“, "всевказань“, "казаньгостеприимная” хештегларын билгеләргә тиеш була. 7 гыйнвардан соң очраклы саннар генераторы ярдәмендә җиңүчене ачыклыйбыз. Ул 5 кг казылык алачак”, - дип сөйләде Дарья Санникова.

“КышДаКар-фест” 29 декабрьдә “Тукай мәйданы” метро станциясе янында Петербург урамында башланып китә. Ярминкә милли кухня, сувенирлар, мастер-класслар белән гөрләячәк һәм ул 31 декабрьгә кадәр дәвам итә.

2 гыйнварда фестиваль Бауман урамы башланган җиргә – Фәннәр академиясе янына күчә.

Фото: архив/Салават Камалетдинов

https://tatar-inform.tatar