Саба таңнары

Киләчәктә ачлык булачагына ышанасызмы? (сораштыру)

Тагын 30 елдан дөньяда ачлык башланырга мөмкин. Бөтендөнья кыргый табигать фонды (WWF) белгечләре шулай дип фаразлый. Алар китергән мәгълүматларга ышансаң, Россиядә яшәүче һәр кеше елына якынча 100 килограмм чамасы ризык ташлый икән. Дөнья күләмендә исә барлык азык-төлекнең 31 проценты чүплеккә ыргытыла. "Болай дәвам итсә, 2050 елда дөньяда ачлык башланырга мөмкин....

Руслан АЙСИН, сәясәт белгече:


- Ачлык бар ул, беркая да китмәде. Африкада, Көн­чы­гыш илләрендә ул - га­дәти әйбер. Шул ук Сүрияне генә алыйк. Биредә берничә миллион кеше ач тора, гуманитар һәлакәт күзәтелә. Шул ук вакытта, капиталистик илләр миллионлаган тонна азык-төлек җитештерә, кү­бесен чынлап та урамга ташлый, йә хайваннарга ашата. Бу - дөньякүләм социаль тигезсезлек. Монда тагын бер проблема бар. Бай булмаган социаль катлау ГМОлаштырылган ризык ашарга мәҗ­бүр. Аның сәламәтлеккә зыяны турында күп кенә тикше­ренүләр, фәнни хез­мәтләр дә бар. Шулай итеп бу проблема ике тармакка бүленә. Берен­чедән, дөнья­да халык саны ар­та, азык-төлек кими барачак. Нәти­җәдә ачлыктан үл­гәннәр саны артачак. Бу күб­рәк ярлыларга кагыла, әл­бәттә. Икенче яктан, экологик яктан чис­та ризык бик кыйммәт булганлыктан, урта сыйныф ГМО шартлары бе­лән җи­теш­терелгән азык ашарга мәҗбүр. Шулай итеп, 2050 елга без глобаль ачлыкны гына түгел, генетика дәрә­җәсендә киләчәк буыннар­ның үзгәрешен дә күрә­чәкбез әле. Мин үзем - исәп­ләп тотучан кеше. Гаилә­безгә кирәк булган норманы гына сатып алабыз. Кибеттән арбалап ризык ташымыйбыз. Аннары, исраф гөнаһ санала бит. Шуңа ризыкны ташламаска тырышам.

Айгөл БӘДРЕТДИНОВА, "Яңа гасыр" каналында "Хәбәрләр" тапшыруы алып баручысы:


- Бүген бернәрсәне дә алдан фаразлап булмый. Аеруча киләчәкне. Шәхсән мин үзем ачлык булачак дигән фаразга ышанмыйм. Ник дигәндә, һәртөрле фаразга нигезләнү дөрес түгел дип саныйм. Көндәлек тормышта ризык әрәм итү була инде. Мәсәлән, гаиләбез зур булганлыктан, кайчак ризыкны чамасыз күп пешерергә туры килә. Бу - исраф итү, билгеле. Әлеге гадәттән ничек тә арынасы иде. Тик ризыкны беркайчан да ташлаганыбыз юк. Элек кошларга бирә идек. Хәзер бакчабызда торгызылып килүче йорт янында яшәүче этләрне сыйлыйбыз.

Азат ХӨСӘЕНОВ, Татарстанның атказанган сәнгать эшлеклесе:


- Галимнәрнең бу фаразына бик ышанып бетмим. Халкыбыз эшчән, шәһәр яны бакчалары да артып тора. Үземдә дә икәү алар. Ә менә исраф мәсьәләсендә гаебем бар - бик күп ризык чүпкә таш­лана. Ботка ашап бете­рел­мәсә дә, тизрәк чүп савытына ыргытырга ашыгабыз. Кипкән ипине урамга - кошларга озатабыз. Элек ипигә хөрмәт зур иде. Бәләкәй чакта аның бер кисәген дә ташламыйча, валчыкларына ка­дәр өстәл­дән сыпырып алып ашаулар истә калган.

Зөлфия ГЫЙЗЗӘТУЛЛИНА, Мамадыш районының Катмыш урта мәктәбендә башлангыч сыйныф укытучысы:


- Кеше беркайчан да ачтан үлми. Сугыш чорында да ачлыктан сакланып калганнар. Кыргый кешеләр дә үз­ләренә азык табып ашаган. Ходай җан биргәнгә юнь бирә, диләр бит. Мин азык-төлекне исраф ит­мәскә тырышам, балаларымны да шуңа өйрәтәм. Артык калган азык-төлекне мал-туар, кош-кортка бирә­без.

http://vatantat.ru

 

Без социаль челтәрләрдә: ТелеграмВКонтактеТикТок, ЮтубОдноклассникиТвиттер, Яндекс.Дзен

 

 

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: