Корбан бәйрәме вакытында Татарстанда чипланган хайваннарны гына чалырга рөхсәт итәчәкләр
Исегезгә төшерәбез: быел Корбан гаете 16 июньдә билгеләп үтеләчәк.
Татарстанда Корбан бәйрәме вакытында колак тамгалары булган хайваннарны гына чалырга рөхсәт итәчәкләр. Аларда ветеринария таныклыклары булырга тиеш, дип хәбәр итә ТР Министрлар Кабинетының Баш ветеринария идарәсе матбугат хезмәте.
«Корбан бәйрәме вакытында корбан хайваннарын сату республиканың авыл хуҗалыгы предприятиеләреннән булачак», - диелә хәбәрдә.
Корбан хайваннарын чалу өчен махсус урыннар оештырыла. Моннан тыш, биологик һәм органик калдыкларны җыю өчен контейнерлар урнаштырыла. Бәйрәм тәмамланганнан соң барлык мәйданчыкларда дезинфекция үткәреләчәк.
Бәйрәм көннәрендә барлык мәйданчыкларда ветеринария-санитария экспертлары эшли. Социаль учреждениеләргә ит тапшырырга теләүчеләргә белгечләр ветеринария-санитария экспертизасы үткәрәчәк һәм ветеринария таныклыкларын рәсмиләштереп бирәчәк.
Узган ел Татарстанда Корбан бәйрәме вакытында 13,8 меңнән артык сарык чалынган, шул исәптән 5,8 меңнән артыгы - Казанда.
Тулырак: https://tatar-inform.tatar/news/korban-bairame-vakytynda-tatarstanda-ciplangan-xaivannarny-gyna-calyrga-roxsat-itacaklar-5886609
Следите за самым важным и интересным в Telegram-каналеТатмедиа
Нет комментариев