Миңнеханов Covid-19 аркасында Татарстан территориясендә югары әзерлек режимын кертте

ТР Президенты Рөстәм Миңнеханов яңа коронавирус инфекциясе таралу куркынычы белән бәйле рәвештә республика территориясендә югары әзерлек режимын кертү турындагы указга кул куйды.

«Татарстан Республикасының гадәттән тыш хәлләрне кисәтү һәм бетерү буенча территориаль ярдәмче системасы идарәсе органнары һәм көчләре өчен 2020 елның 19 мартыннан югары әзерлек режимын кертергә һәм төбәк (муниципальара) җавап бирү дәрәҗәсен билгеләргә», — диелә документта.

Күрсәтмәне гамәлгә ашыруны Татарстан Республикасы Премьер-министры контрольдә тота.

Исегезгә төшерәбез, коронавирус таралуга каршы көрәш буенча республика штабы Татарстан Президенты Рөстәм Миңнеханов йөкләмәсе буенча республикада 15 апрельгә кадәр махсус санитар-эпидемиологик режим кертте.

Фото: архив/Рамиль Гали

Чыганак: tatar-inform.tatar