Мәскәүдә Татарстан Дәүләт Советының элеккеге рәисе Василий Лихачев белән хушлаштылар

Мәскәүдә Үзәк клиник хастаханәдә Татарстанның элеккеге вице-президенты, Татарстан Дәүләт Советының элеккеге рәисе Василий Лихачев белән хушлашу чарасы узды. Аны Татарстанның Россиядәге Тулы вәкаләтле вәкиле Равил Әхмәтшин алып барды.

«Татар-информ» мәгълүмат агентлыгы корреспондентына Татарстанның Россия Федерациясендәге Тулы вәкаләтле вәкиллеге матбугат хезмәте җитәкчесе Динә Аляутдинова хәбәр иткәнчә, Василий Лихачев белән хушлашырга Россия Үзәк сайлау комиссиясе хезмәткәрләре, Федерация Советы һәм Дәүләт Думасы вәкилләре, шулай ук федераль министрлык һәм ведомство хезмәткәрләре килгән.

«Беренче булып Россия Үзәк сайлау комиссиясе рәисе урынбасары Николай Булаев чыгыш ясады, аннары сүзне Россия Үзәк сайлау комиссиясенең элеккеге җитәкчесе Владимир Чуров алды. Россия Тышкы эшләр министрлыгы исеменнән аерым йөкләмәләр буенча илче Андрей Нестеренко, Федерация Советыннан — Олег Морозов, Россия Дәүләт Думасыннан Илдар Гыйльметдинов чыгыш ясады», - диде Аляутдинова.

Лихачев белән хушлашырга килүчеләр арасында Россия юстиция министры урынбасары Али Алханов, академик Василий Жуков, Татарстан Эчке эшләр министрлыгының элеккеге министры Искәндәр Галимов та бар иде. Чарада Татарстаннан Дәүләт Думасы депутатлары Айрат Фәррахов, Әлфия Когогина, Ольга Павлова, Айрат Хәйруллин булды.

Динә Аляутдинова сүзләренә караганда, бирегә Россия Федерациясе Хөкүмәте, Россия Федерациясе Федерация Советы, Россия Федерациясе Үзәк сайлау комиссиясе исеменнән веноклар китерелгән. Аннары туганнары Василий Лихачевның мәетен хушлашу һәм җирләү чарасына Казанга алып киткән.

• «Татар-информ» мәгълүмат агентлыгы элек Василий Лихачевны җирләү Казанның Арча зиратында планлаштырылганлыгын хәбәр иткән иде. Гражданлык җеназасы 10 апрельдә 10 сәгатьтә Павлюхин урамындагы Дәүләт филармониясе бинасында узачак.

Фото: пресс-служба Полномочного представительства Татарстана в РФ

https://tatar-inform.tatar