Һәр эшнең дә җае бар
Яшьләргә кая барырга? Бөтенроссия халык фикерен өйрәнү үзәге белгечләре әнә шул сорауга җавап эзләгән. Алар кайсы өлкәләрдә эш табарга һәм югары дәрәҗәгә ирешергә җиңелрәк икәнен ачыкларга тырышкан. Баксаң, спортта уңышка ирешү җиңелрәк икән. Һәрхәлдә, сораштыруда катнашучыларның күбесе (44 процент) шул фикердә.
Чагыштыру өчен, 2014 елда болай җавап бирүчеләр 40 процент тәшкил иткән. Туп тибеп яки ераклыкка йөгереп тормышта үз дигәнеңә ирешергә мөмкин дип уйлаучылар яшьләр арасында күбрәк. Хәер, бу аңлашыла да. Һәркем үз мөмкинлекләреннән чыгып фикер йөртә бит.
Икенче урында – иҗатка бәйле һөнәрләр. Музыкантлар, язучылар, артистлар эш урынында уңышка тизрәк ирешә, дип уйлаучылар 40 процент тәшкил иткән. Беренче өчлеккә фән өлкәсе дә эләккән. Респондентларның 23 проценты энә белән кое казучыларның хезмәт баскычыннан югары үрмәли алуына шикләнми. Сораштыруда катнашучыларның һәр бишенчесе әйтүенчә, иң яхшы карьера ясаучылар ул – дәүләт хезмәткәрләре. Соңгы елларда бизнес һәм сәясәт тармакларында уңышка ирешергә мөмкин дип уйлаучылар саны кимегән.
Кулына диплом алган яшь белгечләрне эшкә урнаштыру мәсьәләсе Татарстан түрәләрен дә борчый. Республикада күптән түгел оешкан Яшьләр эшләре министрлыгында ярдәм дә күрсәтмәкчеләр. Моның өчен “14.30” форматындагы очрашулар оештырыла. Исеменнән үк аңлашылганча, әлеге чараларда 14 яшьтән алып 30 яшькә кадәргеләр катнаша ала. Шундый очрашуларның берсе КФУ каршындагы мәйданда узды. Яшьләр белән министр Дамир Фәттахов аралашты. Ярдәм сүздән эшкә күчәрме – монысын вакыт күрсәтер.
Следите за самым важным и интересным в Telegram-каналеТатмедиа
Нет комментариев