Райондашларыбызның банк карталарыннан зур суммада акчаларын урлаганнар
Гыйнвар аенда РФ Эчке эшләр министрлыгының Саба бүлеге район кешеләренә карата дистанцияле ысул белән кылынган өч җинаятьне теркәде.
Түбән Шытсу авылында яшәүче Ф.ның кесә телефоны аша билгесез кеше белән сөйләшкәндә, банк картасыннан 35000 сумга якын күләмдә балалар пособиесен урлыйлар.
Шәмәрдәндә яшәүче И.га да билгесез кеше шалтыратып, үзен банк хезмәткәре итеп күрсәтә. Аны мошенникларның законсыз гамәленнән йолып калырга теләвен аңлата. Сөйләшү барышында И. банк картасындагы бик зур сумма – 867000 сум акчасыннан колак кага.
Мошенниклар шулай ук Шәмәрдән кешесе А.ның да ышанычын яулыйлар. Нәтиҗәдә хатын-кыз 291850 сумлык зыян күрә.
Шул уңайдан банк хезмәткәрләренең беркайчан да клиентларына телефон аша элемтәгә чыкмаулары, аларга сезнең картаның, счетларның кодлары да, парольләре дә, номерлары да кирәк түгеллеген гражданнарның исләренә кабат төшерәсе килә. Шуңа да, әгәр сезгә шикле шалтырату була икән, сөйләшүне туктатып, картагызда күрсәтелгән номер аша банк белән үзегез элемтәгә керегез.
Диләрә Кәримова,
бүлекнең штаб начальнигы.
Следите за самым важным и интересным в Telegram-каналеТатмедиа
Нет комментариев