Татарстан китап нәшрияты иң күп сатыла торган китап исемнәрен атады

Татарстан китап нәшрияты директоры Илдар Сәгъдәтшин иң күп сатыла торган китапларны атады. Бу хакта ул бүген “Татар-информ”да узган матбугат очрашуында әйтте.

“Быел Абдулла Алиш әсәрләре рус һәм татар телләрендә, Габдулла Тукайның “Су анасы” һәм “Шүрәле”се аерым-аерым китаплар булып чыкты. Бүгенге көндә алар иң күп сатыла торган китаплар булып тора. Моның сәбәбе – аның бәясе бик арзан. Без аны махсус шулай эшләдек. Тиражын зур итеп куйгач, бүгенге көндә аның бәясе беркем ышанмаслык 70 сум гына. Сыйфатын үзегез карап бәяли аласыз. Бу – Татарстан китап нәшриятының легендар рәссамы Байназар Әлменов рәсемнәре белән яңадан бастырылган китаплар”, - диде Илдар Сәгъдәтшин.

Татарстан китап нәшрияты директоры сүзләренчә, “Секреты татарской кухни”, “Сөембикә” альбомы, Татар тарихы, Татарстан халыклары әкиятләренә дә ихтыяҗ бар.

Фото: Султан Исхаков

https://tatar-inform.tatar