Татарстанда Covid-19 авыруының 90 яңа очрагы расланды

Татарстанда узган тәүлек эчендә коронавирус инфекциясенең 90 яңа очрагы ачыкланган, аларның икесе генә читтән кертелгән. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.

«33 кеше хастаханәгә салынды, 57 кеше өйдә дәвалана, аларда авыруның җиңел яки симптомсыз формасы күзәтелә», — диде Галимова.

30 яшьтән 50 яшькә кадәрле кешеләр аеруча күп — алар 40 кеше. Икенче урында — 60тан 70 яшькә кадәргеләр, бу яшь аралыгында 16 кеше чир йоктырган. Өченче урында 50дән 60 яшькә кадәрге кешеләр, бу яшь аралыгында 14 авыру теркәлгән.

Инфекция йоктыручыларның күбесе Казанда яши. Бу — 39 кеше. Чаллыда 18 авыру очрагы теркәлгән.

Covid-19 таралу чорында Татарстанда әлеге авыру 1761 кешедә расланган.

Татарстанда Covid-19 инфекциясеннән пациент үлеменең алтынчы очрагы теркәлгән. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.

«Алабуга районында 1950 елда туган кеше вафат булды. Ул Тукай районы хастаханәсенә 13 апрельдә салынган иде», — диде Галимова.

30 апрельдә пациент Чаллы шәһәренең 2нче хастаханәсенә күчерелгән. Аңарда катлауланган ике яклы полисегментар пневмония һәм Covid-19 коронавирус инфекциясенең авыр формасы була. Ир-атны ИВЛ аппаратына тоташтыралар. Вафат булган кешедә хроник авыруларның авыр формалары күзәтелгән.

Фото: "Татар-информ" архивы

Чыганак: tatar-inform.tatar