Татарстанда корбан чалу урыннары билгеләнде

Мөселман кардәшләр корбан чалуны мөфтиятнең мөхтәсибәтләре карамагында эшләгән 33 мәйданчыкта башкара алачак. Бу хакта ТР Диния нәзарәтенең матбугат хезмәте хәбәр итә.

«ТР Министрлар кабинетының Ветеринария буенча баш идарәсе мәгълүматлары буенча, республикада аларны 55 урында оештырырга мөмкин иде. Әмма, пандемия аркасында, Диния Нәзарәтенең мөхтәсибәтләре тарафыннан аларның саны киметелде. Шул рәвешле, корбан чалырга теләүче дин кардәшләр моны мөфтиятнең мөхтәсибәтләре карамагында эшләгән 33 мәйданчыкта башкара алачак», диелә хәбәрдә.

Корбан чалу урыннары исемлеге белән сылтама аша танышырга мөмкин.

31 июльдә бөтен дөнья мөселманнары төп ислам бәйрәмнәренең берсе — Корбан бәйрәмен (яки Гыйд әл-адха) каршы алачак. Ел саен ул Зөлхиҗҗә аеның 10нчы көнендә билгеләп үтелә.

Казан һәм Татарстан мәчетләрендә 31 июль көнне бәйрәм намазын уку өчен мәчетләргә иртәнге 3.30 сәгатькә җыелырга тәкъдим ителә. Бу вакытта Коръәннән аятьләр укырга керешәчәкләр. Сәгать 3.45тә Корбан гаете вәгазьләре башланачак. Ә гает намазы сәгать 4.15кә билгеләнгән. Сәгать иртәнге 4.30-дан корбан чала башларга мөмкин. 

Фото: dumrt.ru

Чыганак: tatar-inform.tatar