Язлар безгә назлар алып килд

Казан шәһәр филармониясе үз кочагына республикабызда иҗат итүче иң популяр җырчыларны җый­ган дисәк тә, мөгаен, ялгышмабыз. Тамаша залы бер-бер артлы Рөстәм Асаев, Резидә Шәрә­фиева, Гөлшат Имамиева, Ясмин, Айдар Габдинов, Алинә Шәрип­җанова, Эльвира Хәй­рул­лина, Сиринә Зәйнетди­нова кебек талантларның моңы белән иркәләнде. Музыкаль-инструменталь, бию ан­сам­бльләре дә кушылгач, сәхнәдә тулы бер гармония пәйда булды.

Рәис Кави улы Шакиров җитәкчелегендәге Казан шә­һәр филармониясе – бү­ген республикабызда иҗат итүче иң зур концерт оеш­мала­рының берсе. Аның коллективы да бик саллы. Без яратып тыңлаган җыр­чыларның күбесе диярлек филармония канаты астына сыенган. Алар­га анда иҗат итәргә мөм­кинлек бирелгән. Бер сезон эчендә генә дә филармония йөзләрчә концерт оештыра. Иҗат итеп кенә калмый, бәлки, продюсерлык бурычларын да алып бара. Шуңа күрә дә бу коллективка иң җаваплы һәм җитди чараларны оештыру эшен йөклиләр.

Татарстан турында әй­теп торасы да юк, әгәр Рос­сиянең төрле төбәкләрендә, хәтта чит илләрдә татарның җыр­лаганын, биегәнен ише­тәсез икән, монда Казан шә­һәр фи­лармониясенең бик тә катнашы булырга мөмкин. Бу исә аның Татар конгрессы белән ныклы элемтәдә яшәвенә бәйле. Белгәнебез­чә, төрле кыйтгаларга таралып яшәгән милләттәшлә­ребез белән очрашулар гел булып тора. Әлбәттә инде, татар дөнья­сындагы мондый күрешүләр җыр-моң­сыз була алмый. Әнә шулай итеп шәһәр филармониясе артистлары мил­ләте­безнең данын ерак­ларга таныта. Алай гына да түгел, җырчы­ларыбыз төр­ле ил­ләрдә төрле телләрдә дә бик оста җырлыйлар. Ни әйтсәң дә, кунакка баргач, хуҗа­ларның күңелен күрү – әйбәт гамәл инде ул. Бу яктан филармония составында Та­тарстан­ның халык артисты Чулпан Закирова җитәкче­легендәге “Казан” бию ан­самбленә җи­теп булмый торгандыр, мө­гаен. Кайсы гына илләрнең, нинди генә ха­лык­ларның бию­ләрен сәхнәгә куймый алар! Һәрберсе шул дәрә­җәдә эчтәлекле ки, хәтта сүзсез генә дә гореф-гадәт­ләрне, тарихны аңларга була. Татарстанның халык артисты Рәсим Ильясов җитәк­челе­гендәге “Казан нуры” халык инструментлары ансамбле исә тамашаның буеннан-буена сәхнәдән төш­мәде. Хәер, бу тамашада гына түгел, башка концертларда да, дә­рәҗәле бәйгеләр­дә дә алар­ның урыны гел түрдән.

Филармониянең байлыгы моның белән генә чик­ләнми әле. “Вернисаж” инструменталь трио, Россия Федера­циясенең атказанган мәдә­ният эшлеклесе Николай Богданов җитәкче­леген­дәге “Веселые волгари” фольклор-эстрада ансамбле, “Зө-ләй-лә” триосы, “Алсу – Фәридә” дуэты да эшчән­леген филармониядә җәел­дергән. Моңа өстәп, баянчылар, флейтачылар, сән­гатьле уку осталары турында да әйтеп китсәң, чыннан да, филар­мониянең нинди мөм­кинлекләре барлыгын чамаларга була. Өстәвенә монда, буыннар чылбыры өзелмә­сен дип, яшь талантларны гел барлап, үзләренә чакырып торалар.

Гомумән алганда, Казан шәһәр филармониясе ул – яңа типтагы мәдәният уч­реждениесе. Бу – нәрсә ди­гән сүз соң? Бу – оешма кү­ңел ачу белән генә шө­гыль­ләнми, бәлки тәрбия, белем бирү, агарту эшләрен дә берьюлы алып бара, шул ук вакытта иң төп бурычы итеп төрле төбәкләргә сибелеп яшәгән милләттәш­ләребез­нең го­реф-гадәт­лә­рен, мә­дәни мирасын сак­лау­ны һәм популярлаштыруны саный дигән сүз.

...Безгә яз бүләк иткән тамашада да нәкъ шулай булды. Алып баручылар, “язларда да кышлар була икән” дип, табигать турында да сөйлә­шеп алдылар, “һәр­кем­нең үз язы, үз моңы була” дип фәл­сәфәгә дә бирел­деләр, “кычытканлы аш файдалы” дип, язгы милли ашлар әзерләргә дә тәкъдим иттеләр, “чын яз авылда була” дип сөрән салдылар, туган нигез турында да әңгәмә кордылар. Иң мө­һиме, инде бакыйлыкка күч­кәннәрне дә, өлкән яшьтәге сәнгать әһелләрен дә хөрмәт белән искә алдылар. Арада Айрат Арсланов, Әлфия Галимова, Усман Әлмиев, Рәшит Ваһа­пов, Флера Сөләйма­нова, Хәм­дүнә Тимергалиева, Рөстәм Закиров кебек яз көне туганнар да бар икән. Шул уңайдан Рөстәм Закиров башкаруында “Эзләдем сине” җырын “өлкән буын җыр­чыларның тиңдәшсез, кабатланмас эшчәнлегенә мәдхия булып яңгырасын” дип тә­гаен­ләделәр. Мондый изге ниятләр үзләре үк тамаша­чының кәефен күтәрде.

Фото: http://www.vatantat.ru

http://www.vatantat.ru