Журналистлар мигрантлар балаларының социаль-мәгариф адаптациясе барышы белән танышты

Фото: «Татар-информ», Юлай Низаев

Татарстан Республикасы Рәисе Рөстәм Миңнеханов Мәгариф һәм фән хезмәткәрләренең республика август киңәшмәсендә мигрантларның балаларына рус телен укыту темасын күтәргән һәм бу өлкәдә бурычлар куйган иде. Бүген республика матбугаты журналистларын чит ил гражданнары балаларының социаль-мәгариф адаптациясе барышы белән таныштырдылар. Казан шәһәренең Тинчурин урамында урнашкан 51нче санлы мәктәбендәге дәресләрне күрсәттеләр.

«Агымдагы елның 1 апреленнән мәктәпкә кабул итү тәртипләре үзгәрде. Хәзер чит ил гражданнарына яңадан ике өстәмә таләп куела. Беренчедән, алар Россиядә законлы рәвәштә яшәргә тиеш һәм алардан өстәмә дүрт документ – миграцион документлар, туу турында таныклык, дактилоскопия һәм медицина оешмасыннан белешмәләр алып килү сорала. Әлеге документларны тикшергәннән соң гына балалар тест язарга чакырыла», – дип сөйләде Татарстан Республикасы Мәгариф һәм фән министры урынбасары - ТР Мәгариф һәм фән министрлыгының мәгариф өлкәсендә күзәтчелек һәм контроль департаменты җитәкчесе Рәмис Мөҗипов.

Тест язу республикабызда 77 пунктта оештырыла һәм һәр айның бер чәршәмбесендә уза. Тестның биремнәре Мәскәүдә төзелеп, расланып бер көн алдан килә. Биремнәр ике өлештән тора: сөйләм һәм язма. Үтәү вакыты – 15 минуттан алып 75 минутка кадәр.

«Бүгенге көнгә чит ил гражданнарыннан балаларын мәктәпкә укырга алуны сорап 554 гариза килде. Алар арасынннан 30 гариза тулы комплект документация җыеп китермәү сәбәпле кире кайтарылды. Аннан соң калган 524 бала тест узарга чакырылды. Алар арасыннан 427 бала – тестны уңышлы үтте. Бу 82 процентны тәшкил итә, дигән сүз. Күпчелеге аларның Казаннан, Чаллыдан, Әлмәттән һәм Түбән Камадан. Сыйныфлар буенча карасак: мәктәп бусагасын тәүге тапкыр атлап керүче 300гә якын баланың бөтенесе узды. Ни кызганыч, 77 бала тест сынауларын үти алмады», – диде Мөҗипов.

Җитәкче ассызыклап үтүенчә, тестны үтә алмаучылар белән рус телен укыту, белемнәрен камилләштерү һәм тел белү сыйфатларын арттыру өчен төбәкнең 54 мәгариф оешмаларында эш алып барыла. Тестны уза алмаучылар белемнәрен камилләштереп тагын 3 айдан соң тестны тапшырып карау хокукына ия.

• Бүгенге көндә Татарстанда 3,1 меңнән артык мәктәп укучысы – мигрантлар балалары, шулай ук 22,4 меңнән артык чит ил студенты белем ала.

Кызыклы яңалыкларны күзәтеп бару өчен Телеграм-каналга язылыгыз

#Россия мигрантлары #Мәгариф министрлыгы #Рус теле

Тулырак: https://tatar-inform.tatar/news/zurnalistlar-migrantlar-balalarynyn-social-magarif-adaptaciyase-barysy-belan-tanysty-5911072