1 март - Бөтендөнья гражданнар оборонасы көне

Ел саен Бөтендөнья гражданнар оборонасы көне җир шарында яшәүчеләрнең тормышын һәм әйләнә-тирә мохитне саклауга карата мөһим мәсьәләләргә кагылышлы төрле девизлар астында уза. Халыкны эвакуацияләү, гадәттән тыш хәлләр зонасында калган кешеләрне тормыш белән тәэмин итү мәсьәләләрен хәл итү, зыян күргән объектларны һәм коммуникацияләрне торгызу, гуманитар йөкләрне озату, мәдәни мирасны саклау – барысы да гражданнар оборонасы вәкаләтләре.

Бөтендөнья гражданнар оборонасы көне –халыкны яклауга катнашы булган барлык кешеләрнең дә бәйрәме, ә болар исә: җәмәгать тәртибен саклау, хәбәр итү һәм элемтә, медицина, инженер, янгынга каршы, коммуналь-техник, авто-юл, сәүдә һәм туклану, ягулык-майлау материаллары, мәдәни кыйммәтләрне саклау бурычларын хәл итү өчен билгеләнгән коткару хезмәтләре.

Гражданнар оборонасы көненең девизы: "Кисәтергә, өйрәтергә, ярдәм итәргә!"

Халыкара бәйрәм кысаларында, Саба муниципаль районының барлык гомуми белем бирү мәктәп диварларында Гражданнар оборонасы көненә күп кенә төрле чаралар уздырыла. Мәсәлән, ачык дәресләр һәм сыйныф сәгатьләре үткәрелә, аларда табигый һәм техноген характердагы гадәттән тыш хәлләр килеп чыкканда кешеләрнең гамәлләре турында фикер алышалар. Әлеге чараларны үткәрүнең төп максаты- укучылар арасында гражданнар оборонасы буенча белемнәрне пропагандалау.

Шулай ук, 129 нчы янгын сүндерү һәм коткару бүлеге, Саба һәм Теләче районара янгын күзәтчелеге хезмәткәрләре тарафыннан укучы балалар арасында өйдә һәм мәктәптә янгын куркынычсызлыгы кагыйдәләрен искә төшерү, укучыларның язгы ташу вакытында үз-үзеңне тоту кагыйдәләре турында белемнәрен ныгыту, боз астына киткән кешеләргә, үзләренә дә беренче ярдәм күрсәтү алымнарына өйрәнү чаралары үткәрелә.

Башлангыч сыйныф укучылары өчен 129 нчы янгын сүндерү һәм коткару бүлеге бинасында ачык ишекләр көне оештырылды һәм үткәрелде.

Элеге чарада балаларга коткаручы һөнәре турында фильм күрсәтелде, элемтә бүлмәсендә янгынга яки коткару эшләренә чыккан вакытта диспетчер белән каравыл арасында мәгълүмат алмашуның ничек баруы турында сөйләделәр, шулай ук балаларга янгын сүндерүчеләрне чакыртырга мөмкин булган телефон номерларын искә төшерделәр.