Аккүл Бигәнәй авылында яшәүче Ольга Галиева 90 яшьлек юбилеен каршылады

автор, 22 октябрь 2024 - 14:33

1619

Бу көннәрдә Аккүл Бигәнәй авылында яшәүче Ольга Галиева 90 яшьлек олы юбилеен билгеләп үтте. Мөхтәрәм юбилярны социаль яклау бүлеге начальнигы Лилия Гайнетдинова, Сатыш авыл җирлеге башлыгы Фаил Шәфигуллин, район мәдәният бүлеге начальнигы Рөстәм Заһидуллин,район үзәкләштерелгән китапханәләр системасы директоры Ләйсән Билалова тәбрикләделәр.

Галиева (Петрова) Ольга Григорьевна 1934 елның 22 октябрендә Тукай районы Керәшен Маҗыны авылында дөньяга килә. Авыл мәктәбендә башлангыч белем алганнан соң,Түбән Суыксу мәктәбендә укуын дәвам итә.

1953 елда Алабуга шәһәрендәге китапханәчеләр техникумын тәмамлаганнан соң, аны юллама буенча Саба районына эшкә җибәрәләр. Ольга Григорьевна (аңа авылда Оркыя дип дәшәләр) Казанчы Бигәнәй авылына китапханә мөдире итеп эшкә урнаша, шулай итеп бер иске йортта беренче китапханә эшли башлый. 1956 елда Бигәнәй авылында тракторчы булып эшләүче Галиев Әнвәргә кияүгә чыга. Өч кыз, ике ул тәрбияләп үстерәләр.

Тырыш хезмәтләре өчен Ольга Григорьевна 1970 елда “Фидакарь хезмәте өчен” һәм 1989 елда “Хезмәт ветераны” медальләре белән бүләкләнә. Авыл җирлегенең һәрвакыт ярдәмчесе булып тора, төрле эшләрдә катнаша.

Бер баласын, бер оныгын һәм киленен югалту ачысын татыган, шулай да сабырлыгын җуймаган Ольга апа бүгенге көндә балалары, оныклары тәрбиясендә 9 оныгы 12 оныкчыгы булуына куанып гомер кичерә.