Әти-әниләр дә БДИ тапшырды

Ата-аналарның БДИ тапшыруы имтиханнарга әзерләгәндә һәм тап­шырганда балаларының нинди кыенлыклар белән очрашуын яхшырак аңлау өчен менә дигән ысул. Бу шулай ук аларга үзләренең белем дәрәҗәсен бәяләргә һәм мәктәпне тәмамлаганнан бирле белем бирү стандартларының ни дәрәҗәдә үзгәрүен күрергә ярдәм итә.

Районыбызда да Саба гим­на­зиясендә узган акциягә һәр мәк­тәптән быел 11 сыйныфны тәмамлыйсы укучыларның   әти-әниләре һәм башкарма комитет җитәкчесе урынбасары Марат Баһманов кушылды.

“Әлеге чараның төп максаты – әти-әни­ләрне Бердәм дәүләт имтиханы уздыру шартлары һәм таләпләре, кагыйдәләре  белән якыннан таныштыру. Шул исәптән БДИны уңыш­лы тапшыру  өчен түбән сыйныфлардан ук өй биремнәрен вакытында эшләп бару кирәклеген төшендерү. Әти-әниләр белән дә төп БДИ үткәргән хезмәткәрләр шөгыльләнә. Кабинетта урнаштырылган  икешәр видеокамера күзәтүендә үтә, имтихан барышы  контрольдә тотыла. Быел районда 11 сыйныфны – 163, Саба гимназиясен 21 укучы тәмамлый. Алар барысы да гимназия базасында БДИ тапшырачаклар.  Әти-әниләр  баланың имтиханга әзерлегендә зур роль уйныйлар. Баласының  психологик халәтен аңлау әти-әни өчен бик мөһим», – ди  имтихан тапшыру пункты җитәкчесе, гимназия директоры  Айнур Шәй­мәр­данов.

 

Әти-әниләр чын имтихан шартларын үтәп,  “металлэзләгеч” аша уздылар. Һәр катнашучыга имтихан материаллары таратылып, бланк­ларны  тутыру буенча инструктаж үткәрелде. Биремнәр 11 сыйныф укучысы эшли торган форматта,  ләкин күләме белән аерыла. Бердәм Дәүләт имтиханын барлыгы 14 әти-әни тапшырды.

«Кызым Чулпан Сатыш урта мәктәбенең 11 сыйныфын тәмамлый. Өйдә  математикадан имтиханга әзерлек эшләре алып барабыз. Минем профиль физика фәне буенча булгач, югары уку йортында математика бик көчле бирелде, имтихан авыр булды дип әйтә алмыйм. Балалар өчен катлаулы биремнәр бар. База күләмендә бирелсә дә, җиңел димәс идем.  Тырышканда эшләргә мөмкин. Олы кызыбыз инде югары уку йортын тәмамлады. Бу хисләрне икенче тапкыр кичерәбез. Кызым үзен дизайн өлкәсендә сынап карарга тели. Имтиханны дүрт фәннән: тарих, җәмгыять белеме, математика һәм рус теленнән бирергә җыена. Бөтен укучыларга да уңышлар телим», – диде Сатыш мәктәбенең физика һәм информатика укытучысы  Рәдиф  Рәхимов. 

БДИ вакыты тәмамлангач, әти-әниләрнең имтихан эшләре тикшерелеп,  нәтиҗәләр белән таныштырылды.

“Әти-әниләргә вакыт табып кил­гәннәре өчен рәхмәт әйтәсем килә.  Мин бүгенге акциягә  үземне сынап карау теләге белән килдем. Биремнәрнең төрлесе бар. Укучыларга җиңел түгеллегенә тагын бер кат инандык. БДИ  20 ел дәверендә дәвам итә.  Мин иске система белән имтихан тапшырган кеше.  Мәктәпне тәмамлаганга  22 ел,  әмма шактый биремне эшли алдым. Мәктәп программасы яхшы үзләштерелгән булган дип саныйм,  - дип  фикерләре белән уртаклашты Марат Баһманов.