Газ һәр фасылда саклык сорый

Яз көне аеруча нәрсәләргә игътибарлы булырга? Әлеге сорау белән “Сабагаз” идарәсенең йорт эчендәге газ  җиһазларын техник карау һәм  ремонтлау бүлеге җитәкчесе  Нияз Ишниязовка мөрәҗәгать иттек.

– Әйе, хәзер табигатьнең көй­сезләнә торган вакыты. Көн­дез­ләрен кояш кыздырса, төннәрен  салкын юлларны боз­лан­дыра, морҗа башларын бәс­лән­дерә. Җылы яктан кошлар кайтып үзләренә урын эзлиләр. Шул сәбәпле, төтен һәм вентиляция каналларының башлары бәс, боз белән капланмасын һәм кошлар оя кормасын  өчен аеруча игътибар белән тикшереп, карап торырга кирәк.
Газ миче, колонкасы һәм пли­тәсе  – болар  кеше тормышы өчен уңайлылык белән  бергә зур  куркыныч тудыручы җайланмалар. Аларның төзек булмавы, әз генә тайпылыш белән эшләве дә безнең сәламәтлегебез һәм гомеребез өчен куркыныч. Хәвеф-хәтәр булмасын өчен, газ приборларына даими техник карау үткәрү мөһим.
Һәрбер абонент техник карау үткәрү буенча җаваплы оешма белән килешү төзергә тиеш. “Сабагаз” идарәсенең әлеге өлкәдә аттестация үткән белгечләре план буенча елга бер тапкыр техник карау уздыра. Аларның төп вазыйфалары - газ приборларының дөрес эшләвен тикшерү, төзек булмаган урыннарын табу, тапкан очракта - төзәтү.
Техник карау уздыручы газчы алдында иң зур  уңайсызлык булып фатирларга, шәхси йортларга вакытында керә алмау тора. Абонентларның кайбер очракта, өйдә булып та, газчыларны өйгә кертмәүләре күзәтелә. Бу зур хата. Әлеге кешеләр үзләрен генә түгел, күршеләрен дә зур куркыныч астына куя. “Сабагаз” идарәсенең махсус белеме һәм лицензиясе булган белгечләрен йортларына, фатирларына керт­мәгән абонентларга 5000 сумнан 10000 сумга кадәр штраф каралган. Шушы ук күләмдә штраф газ приборларын үз белдеге белән алмаштырган, башка урынга күчергән өчен дә салына ала.  Газ приборларына вакытында килешү төземәгән абонентларны да җаваплылыкка тарту каралган.
Хөрмәтле газ белән кулланучы абонентлар! Газ мичләрен кабызыр алдыннан иң элек суыру көчен тикшерү, төтен-вентиляция юлларының төзеклеген, аларның чиста, тыгылмаган булуларын карау, төтен һәм вентиляция каналларындагы суыру көчен даими тикшереп тәртиптә тоту, безнең хәвеф-хәтәрсез яшәешебезнең дөрес кагыйдәсе. Гади генә булып тоелган газ приборлары белән куллану кагыйдәләрен үтәү – безнең имин тормышыбызның төп нигезе. Сез моның белән үзегезнең генә түгел, туганнарыгызның,  күршеләрегезнең, шәхси ху­җа­лыкларда һәм күпкатлы йортларда яшәүчеләрнең дә тормышын, гомерен саклап каласыз!
Әгәр дә газ исе сизсәгез:тиз арада газ приборлары куллануны туктатырга; газ приборы краннарын һәм газопроводтагы краннарны ябарга; бүлмәне җилләтү өчен форточка һәм тәрәзәләрне ачарга; электр приборлары янып торса – сүндермәскә, сүнгән булса – яндырмаска, мобиль телефоннан сөйләшмәскә, электрозвоноклар кулланмаска, тәмәке тартмаска, фатир, өйдә булган кешеләрне урамга чыгарырга кирәк!
Тиз арада 2-32-04, 104 номерлары аша авария-диспетчерлык хезмәтенә, яки 112 гә шалтырату сорала.

Газ җиһазларын шундый тәртипсез хәлдә тоту – аяныч хәлләргә китерергә мөмкин.