Лесхоз шахматчыларны берләштерде

  22 мартта Лесхоз бистәсендә Татарстан Республикасы һәм Россия Федерациясенең атказанган урманчысы, “Почет билгесе” һәм “Октябрь революциясе” орденнары, “Кызыл Байрак” премиясе лауреаты Нургали Миңнеханов истәлегенә багышланган шахмат турнирына республиканың сигез районыннан  барысы 264 спортчы һәм шахмат уенын үз итүче килде.

Әгәр исән булса 24 мартта  матур эшләре, шаулап үскән урманнары, фидакарь хезмәтләре  белән халкыбыз күңелендә яшәгән  Нур­гали Миңнехан улына 95 яшь тулган булыр иде.

Күренекле шәхес, атаклы урманчы истәлегенә багышланган  тантаналы чара иң элек  һәй­кәленә  чәчәкләр салудан һәм каберенә зиярәт кылудан башланды. 

“Әти чын мәгънәсендә хыялый, тормышны алдан күрүчән кеше иде. Халыкның тормышын яхшырту өстендә дә бик күп өлеш кертте. Мин аның алдан күрүчәнлек сыйфатын шахмат уенын яратуы  белән бәйледер дип уйлыйм.   Бу спорт төрен яратучылар авырлык­лардан чыгу юлын күрәләр. Баш миен эшләтүдә дә әлеге өстәл  уенының  роле зур. Балалар бакчасыннан башлап, шахматның элементар кагыйдәләрен өйрәтү бурыч булып тора. Бүгенге турнирның төп максаты яшь буынны шахмат белән кызыксындыру  булса, шул ук вакытта  өлкәннәр үз мисалларында ничә яшьтә булуларына карамастан баш миенең яхшы эшчәнлеген күрсәтәчәкләр”, – диде ачылу тантанасында район башлыгы  Рәис Миңнеханов.   

Традицион турнирга балалар бакчаларына йөрүче нәниләрдән алып,  мәктәп укучылары,  бу спорт төре белән мавыгучылар,  профессиональ төстә шөгыльләнүче  иң көчле спортчылар  җыйналды.  Нургали аганың дәвамчылары, дүрт оныкчыгы –  Нургали, Кә­бир, Камал һәм Миргали Миң­нехановлар катнашып, халык кү­ңелендә якты эз калдырган бабалары рухын сөендерделәр.  Иң яшь катнашучы 2020 елгы  Альмир  Арсланов булса,  ә иң өлкән  шахматчы булып Лесхоз бистәсеннән 81 яшьлек  Хәмит Мөгътәсимов танылды.

“Мин әлеге ярыш оештырыла  башлаганнан бирле  катнашам. Һәр елны көтеп алабыз, мин иң өлкәннәрдән саналам. Шахматны мәктәптә укыганда ук уйный  идем. Акрынлап көчле уйнаучылар  белән  көч сынашып шомардык. Шахматчыларның ту­­ган көннәрен билгеләп үтү га­дәте кереп китте,  шуңа да еш очрашып торабыз. Шахматта да шул ук кагыйдә: көчлеләр җиңә, көчсезләр бирелә”, – ди Хәмит   абый.   

Ярышта катнашучылар 13 төрле яшь  категориясенә бүленеп көч сынаштылар. Ярышта шахмат бу­енча спорт мастеры һәм  кандидат дәрәҗәсе алган 10 көчле спортчы  катнашучы  турнирның дәрәҗәсен тагын да арттырды.

  “Әлеге турнир бик сәләтле балалар барлыгын күрсәтте. Биредә киләчәктә республика чемпионы булачак яшь шахматчылар үсүе куандыра.  Бала шахматны  ничек иртәрәк  уйный башлый,  шулай уңышка тизрәк ирешәчәк”, – диде шахмат төре буенча 1 категорияле хөкемдар  Эдуард Данилов.

Һәр тур тәмамлануга  билгеле сылтама аша  онлайн тәртиптә танышып бару мөмкинлеге тудырылган иде. Уеннар җиде турда, унар минут дәвам итте.

Уен нәтиҗәләренә килгәндә,  2017  елгы һәм аннан кечерәк ма­лайлар арасында Сабадан Инсаф Габделхәев 2 урын, Бәхтияр Вахитов 3 урын яулады.  Кызлар арасында  Адилә Степанова–1, Алина Батталова 2 урын алды. 2015-2016 елгы малайлар арасында  Йосыф Низамиев-1, кызлар арасында Алинә Әхмәтова 3нче урынга ия булды.  2013-2014 елгы кызлар арасында 1 урынны Аделина Батталова яулады. 2010-2012 елгы малайлар арасында Наир Хәсәнов – 3, кызлар арасында Зәлия Мөхәммәтҗанова – 1,  Галия Билалова 2 урынны алды. 2007 -2009 елгы малайлар арасында Адель Сафин – 1 урын яулады.  18 яшьтән өлкәннәр  ха­тын-кызлар категориясендә  Ади­лә Сөнгатуллина 2 урын,  55 яшь­тән өлкәннәр арасында  Нәкыя Төхфәтуллова -2, Иркә Тимербаева 3 урын яуладылар. Спорт мастерлыгына кандидат ир-атлар арасында Марат Закиров 3 урынга лаек булды.  18 яшьтән югары ир-атлар арасында Салават Габдрахманов – 1, Рафаэль Гатиятов 2 урын иясе булды.   65 яшьтән өлкәннәр арасында Зөфәр Мөхәммәтшин – 2, Мулланур Мусин 3 урын яулады.  Уенның тулы нәтиҗәләре белән сайтыбызда таныша аласыз.