Полициядә очраклылар эшләми

   Полициядә хезмәт итү җи­ңел түгел. Эчке эшләр ми­нистрлыгының Саба бүлеге коллективы да моны яхшы  аңлап, тәртип сакчысы  формасын  кигән ир-егетләр хисабына тулылана. Алар  үз бурычларын закон  кушканча, лаеклы башкара. Ун айлык эш  нәтиҗәләренә   килгәндә,  бүлек республика буенча  алдынгы позицияләрдә  кала. Криминалистик яктан ка­раганда теркәлгән җи­на­ять­ләр былтыргының шу­шы   чоры   күрсәткече бе­лән  чагыштырганда 9,3 процентка  кимегән. Моңа профилак­ти­ка эшенә игътибарның нык кө­чәй­телүе нәтиҗәсендә ире­шелгән. Хезмәткәрләр барлык юнәлешләрдә үткәрелгән  60ка якын  оператив  чарада катнашкан. Башка хокук саклау органнары һәм оешмалар белән үзара хезмәттәшлек, җинаятьчелекне  кисәтүгә каршы яңа  алымнар  куллану – уңыш гарантиясе.

Халык та полициягә ышана, үзен яклаучы итеп  карый. Кеше бәлагә тарыганда яки авыр хәлләрдә калганда аннан хокук саклау органнарыннан башка чыга алмый. Мәсәлән, алдакчылар капкынына эләксәгез, нишлисез?! Әле  шушы  көннәрдә генә районыбыз авылларының берсендә яшәүче өлкән яшьтәге апа кеше  мошенниклар тозагына кабып, 1,5 миллион сумга якын акчасыннан колак каккан. Аңа җинаятьче:

“Банк­тагы  акчаңны алмакчы булалар, тизрәк ышанычлы счетка  күчереп куй”,– дип шал­тыраткан. Куркуга калган 1940 елгы әби банкка барып, әй­телгәннәрнең барысын  да эшләгән. Әмма, ни кызганыч, полициягә өч көннән  соң гына килгән.  “Хәзер әлеге факт буенча тикшерү бара. Гомумән, алдарлар корбаны булучылар   күп. Кайберәүләр беркатлы, башкаларга артык ышанучан. Нәтиҗәдә былтыр интернет  челтәре һәм элемтә чаралары  ярдәмендә 33 җинаять кылынган булса, быел 34кә җитте. Мошенниклык  фактларының 59,4 проценты фаш ителде. Дистанцияле  җинаятьләрнең очына  чы­гу  өчен оперативникларга Чи­ләбе, Санкт-Петербург шә­һәр­ләренә кадәр барырга туры   килә”, – ди Саба районы буенча бүлек начальнигы  Васил Исмәгыйлов.  

Без капчыкта ятмый, диләр. Җинаять өчен җәзаның котылгысызлыгы принцибын сак­­лап, тикшерүчеләр бер­ни­чә ел элек кыңгыр гамәл кы­­лучыларның да эзенә тө­шә. Мәсәлән, быел судка шун­дый 6 эш җибәрелгән. Җи­на­ять­ләрнең  ачылышы буенча бү­лек республикада  алдынгы урын­­нарда бара.  Кыңгыр эшләр еш кына опе­ратив-эзләү чаралары  кы­­­­саларында  полиция хез­мәт­­­кәрләренең шәхси инициа­ти­­васы белән ачыла. Районда быел  кеше үтерү, көчләү, сәламәтлеккә авыр  зыян  салу  фактлары теркәлмәгән. Милекне юк итү, административ күзәтчелек таләпләрен бозулар, наркотикларның законсыз әйләнеше белән  бәйле җинаятьләр кимегән.

 “Барысы да  уртак хезмәт җимеше. Коллектив бердәм. Вакантлы  урыннарга әллә  каян  читтән  кеше алмыйбыз, үзебезнең  кадрларны тәрбиялибез. Яңа  килүче кайбер яшьләрнең әтиләре кайчандыр милициядә эшләгән, димәк,  алар үзләрен нинди җаваплы хезмәт  көткәнен  ях­шы белә. Частьта кизү торучыны гына алыйк. Белем, зур көч таләп итә торган эш. Кизү часте дежурныйларына үзгә фи­кер йөртү һәм нык характер  кирәк. Полиция майорлары Раил Гәрәев, Радик Әдһәмов та байтак  еллар дәвамында шу­шы хезмәттә зур тәҗрибә туп­ладылар.  Кадрлар буенча баш белгеч  Диләрә Кәримова да эш­тә күпьеллык тәҗрибәсенә, юри­дик белеменә, хатын-кыз тоемлавына таяна. Башкалар турында да үзеннән күбрәк бе­лешә аласыз”,– диде бүлек начальнигы.

Уртак уңай күрсәткечләрдә һәр бүлекчәнең үз өлеше бар. ЮХИДИ хезмәткәрләре, го­му­мән, 9 айлык эш нәти­җә­ләре буенча республикада беренчелеккә  чыккан.  Тик­ше­рүчеләр төркеменә тукталсак, хәзерге  көндә юстиция под­полковнигы Айнур Гафиятуллин, Роза Зыятдинова җи­­наять эшләрен тикшерүдә опе­ративлык һәм профессионализм күрсәтәләр. Штабның өлкән  инспекторы Ләйлә Гайнетдинова, җинаятьчеләрне эз­ләү төркеме хезмәткәре Са­лават Хәбибрахманов та ва­зи­фаларының нечкәлек­ләренә тиз төшенгәннәр. Кадрлар әзер­­ләүгә игътибар зур. Узган  ел мәктәп тәмамлаган  3  укучы­ны  Казан  юридик  институты­на әзерләп җи­бәргәннәр. Быел да кандидатлар барлана. Яшьләр, полиция минем  эш түгел икән дип,  соңыннан китә торган бул­­масыннар  өчен  барысын  да  алдан  кайгырталар. 

“Ветераннарны да онытмый­быз. Аларга сәламәтлек, якын­нарының хөрмәт-ихти­рамын тоеп яшәү насыйп  булсын. Хез­мәттәшләремә эш­ләрендә уңышлар, рух ныклыгы, нык­лык-барлык телим”,– ди Васил Исмәгыйлов.  

Ун айда  бүлекнең  кизү час­тена  1233 гариза һәм хәбәр кер­гән. Алар  буенча  97 җи­наять эше  кузгатылган, 231 ад­минист­ратив беркетмә тө­зел­­гән. Хезмәткәрләр адми­нист­­ратив хокук бозуларның 4625 очрагын теркәгән.