Сабага килгән Кытай кунакларын балалар ипи-тоз һәм кытайча җырлап каршы алды
Узган атнада районга эшлекле сәфәр белән Кытай Халык Республикасының Татарстандагы консулы Сян Бо әфәнде, мәгариф эшләре буенча икенче сәркатип Лю Сюецзяо, консул-атташе Се Сыци килде.
Сәләтле балалар мәктәбе укучылары кунакларны ипи-тоз, ачык йөз һәм җыр-биюләр белән каршы алды.
“Гүзәл Саба якларына янәдән килүебезгә мин бик шат. Балаларга тирәнтен белем бирү мәктәбе районның энҗе бөртеге дип саныйм. Биредә ныклап белем алу өчен бөтен мөмкинлекләр дә тудырылган. Укучыларның кытай телендә чиста итеп чыгыш ясавы минем өчен көтелмәгән хәл булды. Сезнең мәктәп укучылары да кечкенәдән үк күңелләрендә Кытай белән Россия арасында дуслык орлыклары чәчәрләр һәм үзара элемтәләрне ныгытуга үзләреннән өлеш кертерләр”, – диде Сян Бо әфәнде.
Район башлыгы Рәис Миңнеханов әйтүенчә, Кытай тормышын, аларның мәдәниятен, телен өйрәнүгә нигез 2005 елдан салынган. Шулай ук укыту программасының да бик кызыклы булуын ассызыклап үтте ул.
“Сездән өйрәнәсе әйберләр әлегә бихисап. Алга таба да районыбыз белән Кытай арасындагы дуслык күпере өзелмәсен”, – диде район башлыгы.
Кытай Халык Республикасы консулы Сян Бо мәктәпкә компьютер техникасы бүләк итте. Аның тарафыннан 8 компьютер һәм ике интерактив панель тапшырылды.
“Без хәзерге көндәлек тормышыбызны гаджетлардан башка күз алдына да китерә алмыйбыз. Бу җиһазлар безгә бик кирәк. Уку процессында без аларны кулланачакбыз. Мәгариф өлкәсендә кирәк булган техниканы безгә бүләк итүләре өчен Сян Бо әфәндегә һәм аның коллегаларына бик зур рәхмәт әйтәсебез килә”, – диде мәктәп директоры Нияз Дәүләтшин
Следите за самым важным и интересным в Telegram-каналеТатмедиа
Нет комментариев