17 август көнне «Шоколад» балалар бакчасында гаҗәеп матур һәм җылы милли бәйрәм — Самовар бәйрәме узды. Чараның максаты кечкенә кунакларга халкыбызның бай мәдәни мирасын, аның гореф-гадәтләрен һәм йолаларын җанлы һәм мавыктыргыч формада җиткерү иде.
Нәниләр бу борынгы әйбернең 300 ел элек Тула осталары тарафыннан зур гаиләләр өчен махсус ясалганын ишетеп, соклануларын яшерә алмадылар. Аеруча кызыксыну уятканы борынгы күмер самоварлары булды. Балалар аларның ничек итеп кайнар кузаклы күмер ярдәмендә су кайнатуын, тышкы яктан нинди нәзакәтле бизәкләр белән бизәлгән булуын сорашып-белешеп, кулга тотып карап, тарихка чумдылар.
Бәйрәм дәвамында сабыйлар татар һәм рус халыкларының «Чынаяклар» һәм «Алтын капка» кебек җырлы-биюле уеннарында актив катнаштылар. Шат авазлар, күмәк җырлар яңгырады, нәниләр түгәрәккә басып, кулга-кул тотынышып әйлән-бәйлән әйләнделәр. Бу мизгелләрдә бакча территориясе чын мәгънәсендә дуслык һәм шатлык иленә әверелде. Самавар янында үткәрелгән очрашулар һәрвакыттагыча үзенчәлекле: монда бернинди ясалмалылык юк, бары тик ихлас аралашу һәм җылылык хөкем сөрә.
Чараның күркәм финалы да традиция буенча самовар янында узды. Хуш исле үләннәр кушып пешерелгән, татлы ризыклар белән бирелгән милли чәйне балалар зур канәгатьлек белән эчтеләр. Мондый бәйрәмнәр балаларда туган як тарихына һәм мәдәниятенә карата кызыксыну уята, буыннар арасындагы рухи багланышларны ныгыта һәм киләчәктә дә истә калырлык якты тәэсирләр калдыра.
Нет комментариев