Сатыш авылында яшәүче Хәлимә Миннебаеваны 95 яшьлек юбилее белән котладылар

   Миннебаева Хәлимә  Ибраһим  кызы 1930 елның  27 нче мартында Байлар Сабасында  дөньяга килә. Кызганыч, бала чагы сугыш елларына туры килгәнлектән, Саба мәктәбендә  2 генә класс белем алырга туры килә.

  13-14 яшеннән үк Хәлимә апа Саба сыра заводында, сугышка озату өчен, бәрәңге китптерүдә эшли башлый. Әлеге эшен 1955 нче елга кадәр тырышып башкара. 1955 нче елда Юныс белән тормыш корып җибәрәләр. Сатышка килгәч колхозда төрле эшләрдә эшли. Кая эшкә кушсалар да, кушкан эшен тырышып башкара ул. 1985 нче елда лаеклы ялга чыга. Тату һәм бердәм гаиләдә 3 малай  тәрбияләп үстерәләр. Кызганыч, ире генә иртә үлеп китә. Хәзерге вакытта Хәлимә апаның 5 оныгы 4 оныкчыгы бар. Ул аларның берсен дә үзенең догасыннан калдырмый. Илебез Хәлимә апаның тырыш хезмәтен югары бәяли:төрле елларда Бөек Җиңүнең юбилей медальләре белән бүләкләнә.  Тыл  ветераны Хәлимә апа авылның хөрмәтле кешесе. Кадерле туганнарының күңел җылысын тоеп, улы Васил, килене Әлфирә тәрбиясендә бәхетле картлык кичерә.