ШӘЙНУРОВЛАР ЭКОБОКС ОТТЫ

Конкурс яшь гаиләләр республика җәмәгатьчелеген формалаштыру һәм үстерү, шулай ук авыл террито­риясендә яшәүче яшь гаиләләр арасында инновацион технологияләр буларак, прогрессив үсем­лек­челек тармагын га­мәлгә кертү һәм популяр­лаштыру мак­са­тыннан үткәрелде. Җи­ңүче гаиләләр "сити-фермер" киләчәк һөнәрен үзләштерәчәк. Моның өчен алар прогрессив үсемлекчелек буенча белем бирү программасы узачак һәм ел дәвамында Экобоксларда (үсемлекләр өчен барлык шартлар тудыручы ябык экосистемадан гыйбарәт җиһазлар) үсемлекләр үстерәчәк. “Экобоксны инде айдан артык файдаланабыз. Салат, редиска үстердек. Инде икенче катын утырттык. Бер тәүлек эчендә орлыклар тишелеп чыкты. Конкурска каз өмәсендә төшерелгән видеороликны җибәргән идек. Шул безне җиңүче итте”,– дип шатлыгын уртаклашты Ай­наз Шәйнурова.