Сөйгән ярым – күрше кызы

Күр­ше­ләр булып үскән егет белән кыз, кечкенәдән мал, техника янында кайнашкангадыр, авылны яраттылар. Ху­җалыклар хезмәт хакы түли алмаган елларда да, бәхет эзләп, зур акча артыннан читкә чыгып китмәде­ләр. Шулай да Хаҗип армия хезмәтеннән соң берничә ел шәһәрдә эшләп алды. Әмма бәхет һәм бәрәкәтнең тәме авылда икәнлеген вакытында аңлап, туган якка кайтып төпләнде. Озак еллар амбар мөдире булып эшләгән Нурмөхәммәт абый һәм Тәслимә апаның ишле гаиләсендә бишенче бала булып туган ир-егет ул. Бер гаиләдә 11 бала үстеләр. Бары – бергә, югы уртак булгандыр. Эшчән, гади, тырыш, кече күңелле булып үсте Дәүләтшиннарның балалары.

 
Хаҗипка яр булырлык кыз да күршедә генә үскән икән... Илсөяр, мәктәпне тә­мам­лагач, Сабадагы элеккеге 104 нче һөнәр училищесында пешекче белгечлеген үзләштерде. Ул чактагы “Беренче Май” колхозы аш­ханәсендә эшчеләргә тәмле сыйлар да әзерләде. Хаҗип белән гаилә кордылар. Яшь­ләрнең бәхетен түгә­рәк­ләп, беренче булып ир бала – Нәфис туды. Баланы бакчага йөртү мәшәкате өстәлгәч, Илсөяр озак уйлап тормады, хуҗалыкта төрле эшкә чыкты. Бер-бер артлы тагын ике малай – Илсаф белән Илмаз һәм кызлары Язгөл дөньяга килде. Балалар ялыннан соң,  фермадагы сыер савучыларны ял иттереп, смена алыштыручы булып эш­лә­де. Бүген ул сөтчелек комплексында сыер сава. Хезмәткә күңел биреп эш­ләү үз нәтиҗәсен бирә, күр­сәткечләр шуны раслый. Узган ел бер сыердан 7375 килограмм сөт савып алуга ирешкән ул. Хезмәттәшләре Гөлзилә Мәүлетова, Алсу Дәүләтшина, Раилә Галимова, Факия Һидиятуллина һәм Гөлназ Мәүлетова бе­лән дус-тату эшлиләр. Ба­рың да бердәм, дус булып эшләгәндә генә сыйфатлы продукция җитештереп буласын аңлый алар.

 
– Комплекста бик уңай­лы хәзер, эштәгеләр белән дә килешеп эшлибез, авыл җире өчен хезмәт хакы да әйбәт. Абзарыбызда ике сыер, ике үгез бар. Балалар үскәндә, мал-туар да асрамый булмый, – ди Илсөяр.

 
Гаилә башлыгы  Ха­җип –хуҗалыкның иң тырыш механизаторы. Быел  “Ак­рос-53” комбайнында 21643 цент­нер ашлык суктырып, Президент Рөстәм Миң­неханов вәгъдә иткән 100 мең сумлык премияне алуга да иреште. “Нинди эш кушсаң да, ярар, дип, җи­ренә җит­кереп эшләүче механизатор ул”, – ди хуҗалык җитәкчесе Фло­рид Гайнуллин аның турында. Ел әйләнәсе эштән өзелми тырыш механизатор. Кышын терлекчелектә, яздан көзгә кадәр кырда. Елның елында 600 гектар мәйданга кукуруз чәчә, аннан урак эшенә  керешә ул. Олы уллары Нәфискә дә,  әтисе белән комбайнчы ярдәмчесе булып эшлә­гән­дә, җирне ярату хисе күчкән­дер. Шулай булмаса, Саба аграр көл­лиятенең механика бүл­е­генә укырга кермәс иде ул. Спортта да сыната торганнардан түгел егет. 65 килограммга кадәрге авырлыкта районда узган көрәш ярышларында призлы урын­­нар яулап килә, Сабантуйларда бил алыша. Хол­кыңны, гамәлеңне дә тәр­типтә тотмыйча ярамый. Чөн­ки сеңел, энеләренә үр­нәк, терәк абый булып үсәсе бар Нәфиснең.

http://vatantat.ru