Иң татлы сүз

Газиз әнием! Бу сүз һәркем  өчен

Җир йөзендә иң-иң татлысы.

Насыйп булсын иде аналарга

Бүләкләрнең иң-иң затлысы.

Балам, диеп җанын фида кылыр,

Ялкыннарга керер, утларга.

Йөрәк пәрасе өчен кирәк булса,

Куркыталмый аны туплар да.

Күпме төне  тыныч узды икән,

Туйды микән бер чак йокысы?

Газизе өчен мәңге сүнми торган

 Күңелендә  борчу тойгысы.

Ана-бала. Ни бар тагын шулай

Йөрәк хисе белән бәйләнгән.

Туганда ук Аллаһ бер-беренә

Кендек җебе белән бәйләгән.

Ана җылысын, бала мәхәббәтен

Бер-беренә яши күчереп.

Җиткерәсе олы хисләребез

Калмасыннар иде кичегеп.

Ана күңелен бала бүләк иткән

Шатлык нуры гына бизәсен.

Шатлык яше килсә, килсен, әйдә,

Сагыш яше генә килмәсен.

Фәридә Вилданова.