Акинфеев җанатарлар белән хушлашты

автор, 2 октябрь 2018 - 08:45

884

Игорь Акинфеев Россия җыелмасы өчен уйнамаячак. Бу хакта ил җыелма командасы капитаны җанатарларга мөрәҗәгатендә хәбәр иткән.

Бүген Мәскәүнең ЦСКА футбол клубының рәсми сайтында капкачы Игорь Акинфеевның җанатарларга мөрәҗәгате чыкты. Ул анда илнең җыелма командасы составында чыгыш ясаудан туктавы хакында белдергән.

«Һәрбер тарихның башы һәм ахыры була. Менә менә дә җыелма командадагы чыгыш ясау тарихы үзенең логик ахырына җитте… Җыелма командада 15 ел — ул зур срок. Ел саен ике фронтка уйнау авырга туры килә…», дип белдергән ул әлеге мөрәҗәгатендә. Акинфеев шулай ук җыелма команда составында талантлы яшьләр өлгерүен ассызыклаган һәм аларга юл бирергә кирәклеген җиткергән.