«Өлкән кешене тәрбиягә алган гаилә» проекты ярдәмендә 29 татарстанлы яңа гаилә тапты

Татарстан Республикасында 2017 елдан «Өлкән кешене тәрбиягә алган гаилә» пилот проекты гамәлгә ашырыла. Аның кысаларында ярдәмгә мохтаҗ өлкән кеше аны карау турындагы килешү төзегән гражданның гаиләсенә күченә.

Әлеге социаль ярдәм формасы өлкән буын турында кайгырту традицияләрен сакларга ярдәм итә, ялгыз өлкән яшьтәге кешеләргә өй шартларында яшәргә, битараф булмаган кешеләрнең күңел җылысын һәм кайгыртуын тоярга мөмкинлек бирә.

Бүген республиканың 27 районында 29 шундый гаилә төзелгән, Әлки һәм Түбән Кама районнарында андый гаиләләр икешәр. Бу өлкән яшьтәге кешеләр бер аз комплектлы интернат-йортны тутыра алырлар иде. Проект ярдәмендә әби-бабайлар карау буенча хезмәтләр генә алмадылар, ә өй җылысына һәм чын гаиләгә ия булдылар. Яңа гаиләләрдә аларны яраталар һәм кадерлиләр.

Өлкән кешене тәрбиягә пенсия яшенә җитмәгән, Татарстанда даими яшәүче, хокукка сәләтле булган балигъ булган гражданнар ала ала. Бу кешеләр өлкәннең туганы булмаска тиеш. Өлкән яшьтәге кешене карарга әзер булу рәсми килешү нигезендә, ирекле рәвештә белдерергә тиеш.

Айлык түләү күләме өлкән кешенең сәламәтлек торышына бәйле: инвалид булмаган яки 3 төркем инвалид булган өлкәннәрне караган өчен — 6 мең сум, 2 төркем инвалидны караган өчен — 8 мең сум, 1 төркем инвалидны караган өчен — 10 мең сум каралган.

2025 елдан «Өлкән кешене тәрбиягә алган гаилә» проекты «Гаилә» илкүләм проектының «Өлкән буын» федераль проектының бер өлеше булды.