“Күгәрчен оя корганда”-өченче

Мәгълүм булганча, узган атнада Татарстан Милли китапханәсендә «Ел китабы-2013» республикакүләм бәйгесендә җиңүчеләрнең исемнәрен атадылар. Бәйгегә 219 китап тәкъдим ителгән булган. 47се - татарча проза, 29ы - татарча шигъри җыентыклар, 46сы - балалар китабы, 49ы - рус телендә бастырылган матур әдәбият, 48е - публицистика һәм фәнни-популяр әсәрләр (шуларның 22се татарча, 26сы русча). Иң укыла торган китаплар исемлеге Татарстанның 1541 муниципаль китапханәсе биргән мәгълүматларга карап төзелгән. Һәм әлеге мәртәбәле бәйгенең «Татарча проза» номинациясендә каләмдәшебез Гөлсинә Галимуллинаның «Күгәрчен оя корганда» китабы 3 урынга лаек дип табылды.

Хезмәттәшебезне котлыйбыз һәм яңадан-яңа иҗат уңышлары телибез!