Районда лаеклы ялдагы 8899 өлкән кешенең иминият пенсияләре артты

1 февральдән лаеклы ялдагы өлкәннәрнең иминият пенсияләре артты. Аның күләме 2014 ел өчен куллану бәясе артудан чыгып, 11,4 процентка индексацияләүдән килеп чыкты. Пенсияләрнең артуы безнең районда 8899 өлкән кешегә кагыла.

"Хәзер лаеклы ялдагыларны пенсия белән тәэмин итүнең минималь дәрәҗәсе яшәү минимумыннан ким була алмый. Ул Татарстанда 6310 сум күләмендә билгеләнгән. Әгәр эшләмәүче пенсионерның пенсиясе яшәү минимумыннан азрак, әйтик, 5300 сум гына икән, аңа социаль өстәмә акча билгеләнә. Эшләүче пенсионерга өстәмә түләнми", - диде Пенсия фондының районара идарәсе бүлек начальнигы Наҗия Нуруллина.