Саба районының Явлаштау авылы кызы Айзилә Галиева Калуга шәһәрендә узган «Профессионаллар» Бөтенроссия чемпионатында, чит ил катнашучыларын да узып, беренче урынга лаек булды
Татарстан кызы — Россия чемпионы!
Калуга шәһәрендә «Профессионаллар» (Ворлдскиллс стандартлары буенча) һөнәри осталык буенча Бөтенроссия чемпионаты финалы тәмамланды. Әлеге дәрәҗәле ярышта Татарстан данын яклап, Саба районының Явлаштау авылыннан Айзилә Галиева катнашты һәм искиткеч нәтиҗәгә иреште — ул компетенциядә БЕРЕНЧЕ урынны яулады!
Айзиләнең казанышы аеруча зур мактауга лаек. Ул көндәшлек иткән тармакта аңа тиңнәр булмады: финалда Россиянең барлык төбәкләреннән килгән иң көчле белгечләр белән беррәттән, Беларусь Республикасыннан һәм хәтта Кытай Халык Республикасыннан да катнашучылар чыгыш ясады. Чит ил экспертлары һәм жюри әгъзалары алдында үз эшенең югары остасы булуны раслау — җиңел бирелми торган җиңү.
Яшь белгечнең мондый дәрәҗәдәге уңышы — озак елларга сузылган тырыш хезмәт, максатчанлык һәм һөнәри үсешкә омтылыш нәтиҗәсе. Чемпионат барышында катнашучыларга практик биремнәрне югары төгәллек һәм заманча технологияләр кулланып башкарырга туры килде. Айзилә үзенең теоретик белемнәрен дә, практик күнекмәләрен дә камил дәрәҗәдә күрсәтеп, жюрины таң калдырды.
Явлаштау авылы халкы, якташлары һәм республикабызның бөтен татар дөньясы бу шатлыклы вакыйга белән чын күңелдән горурлана. Без Айзилә Галиеваны олы җиңүе белән котлыйбыз! Аның исеме инде район тарихында гына түгел, бөтен Татарстан күләмендә лаеклы урын алды.
Нет комментариев