Көн тәртибендә – мигрантлар

  Көч структуралары, саклана торган объектлар җитәкчеләре  һәм авыл (шәһәр) җирлекләре башлыклары катнашкан эшлекле сөйләшүне район башлыгы, комиссия рәисе  Рәис Миңнеханов алып барды. Иң элек район территориясендә миграциягә бәйле  вәзгыять турында полиция на­чальнигы Серенат Ногманов сөй­ләде. Чыгыштан  күренгәнчә, 25 мартка районда  176  чит  ил граж­даны исәпләнә.  Алар нигездә Үз­бәкстаннан һәм Таҗикстаннан   ки­лүчеләр.  Шуларның  123е – эш, 5се  уку буенча теркәлгән.  Хез­мәткә  урнашкан гражданнар   эш  урыныннан бирелгән  йортларда  яки аренда торакларында   яши. Вакытлыча  торуга  тиешле  доку­мент­лары  булмаган,  патент  алуга мөрәҗәгать  итү  вакыты чык­­кан, Россия территориясендә бу­лу  режимын  бозган өчен 12 чит ил гражданына административ бер­кетмә төзелгән. Серенат Ногманов аңлатканча,  илдә законсыз яшәүче мигрантларга, документларын тәр­типкә китерү өчен, 1 майга кадәр вакыт бирелгән.  Шуннан   соң законсыз торучы чит ил гражданнарына каршы закон нигезендә каралган чаралар күреләчәк. Россиядә яшәү өчен законлы нигезләре булмаган чит ил гражданнары йә илне калдырып китәргә, йә үзләренең Россия Федерациясендә булуларын за­конлаштырырга тиешләр. Рәис Миңнеханов авыл җирлекләре баш­­лыкларына   мигрантлар белән бәй­ле  мәсьәләләрне  тиз арада  хәл итәргә кушты.

Мәгариф  өлкәсендә һәм яшьләр  мохитендә террорчылык һәм экстремизм идеологиясенә,  колумбайн һәм буллинг күренешләренә каршы тору эшчәнлеген оештыру турында мәгариф идарәсе  җитәкчесе Илфат Шакиров  сөйләде. Мәктәпләрдә буллинг, ягъни яшьтәшләренең баланы җәберләү, куркыту күренеше булуы җәмәгатьчелекне борчый торган кис­кен мәсьәләләрнең берсе һәм әлеге проблеманы хәл итәргә кирәк. Уку  елы башында белем бирү оешмалары хезмәткәрләренең барысы да террорчылыкка каршы инструктаж  узган һәм өйрәнүләр  үткәрелгән. Техник чараларның эш­кә яраклылыгы тикшерелгән. Ин­тернет контентының сыйфатын  контрольдә тоту, китапханә  фондында экстремистик әдәбият булдырмау  юнәлешендә  эш  алып  барыла. Террорчылык һәм  экстремизм   идеологиясенә  каршы тору   өчен   уку  материаллары эшләнгән һәм гамәлгә кертелгән.

Өченче  көн тәртибенә Шәмәрдән авыл җирлегендә террорчылыкны һәм экстремизмны профилактикалау эшчәнлеге торышы, шул исәптән дини оешмалар һәм авыл җирлеге территориясендә  мигрантлар белән эшләү турында мәсьәлә куелган иде. Комиссия  бу  хакта Шәмәрдән авыл җирлеге башлыгы Альберт Вәлиев чыгышын тыңлады.

Саба муниципаль районы баш­лыгының коррупциягә каршы көрәш мәсьәләләре буенча ярдәмчесе Азат Хәлилов 2025 елда  Россия Федерациясендә 2024-2028 елларда терроризм идеологиясенә  каршы тору комплекслы планы чараларын тормышка  ашыруның торышы белән таныштырды.