Миңгәр авылында яшәүче Бибишәмсүнә Вәгыйзовага районыбыз башлыгы Россия Президенты котлавын җиткерде

Бибишәмсүнә Вагыйз кызы  1928 елның 31 мартында Тимершык авылында колхозчы Вәгыйз һәм Сафура гаиләсендә  4 нче бала булып дөньяга килә. 1936 елда  Тимершык  сигезьеллык  мәктәбенә  1 нче класска укырга керә, 4 класс белем ала. Сугыш елларында 1944 елда Үрнәк совхозында укый,  сугыш чорында көче җиткәнчә төрле эшләрдә катнаша: урак ура, ат җигә. Җиңүне шунда каршылый. Сугыш беткәч 2 ел комбайн ярдәмчесе була, төрле эшләрдә эшли.

Бибишәмсүнә  апалар  гаиләдә 5 бала үсәләр. Ул  Миңгәр авылының   Мидхәт исемле егете  белән танышып, 1951 елда кияүгә чыга.   Бергә 59 ел гомер кичерәләр, 5 балалары туа, ләкин икесе үлә. Бүгенге көндә 3 баласы Гүзәлия, Җәүдәт, Флүзә исән-саулар.

  Бибишәмсүнә апа 55 яшендә колхозда төрле эшләрдә эшләп лаеклы ялга чыга.  Тырышып эшләгән хезмәтләре өчен “ Хезмәт ветераны”,  Бөек Җиңүнең юбилей медальләренә ия була. 2010 елда тормыш иптәше Мидхәт абый вафат була. Бүгенге көндә 5 оныгы, 14 оныкчыгы бар.  Бибишәмсүнә апа балаларының, оныкларының ярдәмен тоеп Миңгәр авылында гомер кичерә.