Тылда эшләгән өлкән абыйлар медаль алды

Ватанны  саклаучылар  көне алдыннан районыбызда  тыл хезмәтчәннәре “1941-1945 еллардагы Бөек Ватан сугышында Җиңүгә 80 ел" юбилей медальләре белән бүләкләнде.   Югары Симет һәм Тимершык  авыл  җирлекләрендә ветераннарны  хөрмәтләү чарасында Саба муниципаль районы башкарма  комитеты җитәкчесенең социаль мәсьәләләр буенча урынбасары Марат Кәримов катнашты. Шулай ук яшьармиячеләр сафларында торучылар  да сугыш  чоры балаларын олылауның шаһитлары  булдылар. Мисалга, Түбән  Симет авылында  яшәүче 1932 елгы Мухаматфариз Харисов фронтка  алынган  әтисен  8 яшьлек чагында   Сабага кадәр озата  барган.

“Бик авыр еллар, өстәлдә ризык, кияргә кием юк.  Мәктәптән кайткач икешәр мич бәрәңгесе ашый идек. Телогрейкаларны көндез өскә киеп йөрибез, кич белән өскә ябынып йокладык. Без йокларга яткач самолетлар тагын оча башлый, без куркудан тәрәзәләрне каплап куя идек. Әти яраланып кайтты, бер  ел хастаханәдә ятты.  Култык  таягының  очына  кадак тагып    йөри торган   иде”,– дип искә ала  ул тана җигеп   ашлык ташыган балачагын.

Фариз абый (авылда аны шулай гына  диләр) 4  ел авиация  частенда  хәрби бурычын үтәгәч, туган  авылына  кайта һәм 28  ел шофер булып эшли.  “ГАЗ-53”е белән салам түкләргә берничә тапкыр Казахстанга да бара, Мәскәүгә дә күп  йөри. Колхоз бригадиры итеп тә куялар  үзен. Барыбер машинасына әйләнеп кайта һәм лаеклы  ялга чыкканда “ГАЗ-53”не үзенә бүләк итәләр.  “Фариз белән 66 ел бергә  яшәдек. Биш бала  үстердек. Ул 66 елда әллә нәрсәләр булгандыр инде. Хәзер рәхәт  яшәгәч, алар онытыла  инде”,– дип  сүзгә  кушыла хатыны Җүәйрә апа.

 “Изге  җомга  көнне тирән хөрмәт итеп   килдек.  Бүгенге  матур  тормыш   өчен күрсәткән хезмәтегез  шулхәтле зур. Моның өчен зур рәхмәт  сезгә. Тыл ветераны  буларак, Бөек Җиңүгә  керткән өлешегезне  югары бәяләп,  Хөкүмәт исеменнән шушы  медальне  тапшырырга рөхсәт итегез”,– дип   Марат Кәримов  ветеранга матур гомер, алдагы көннәрендә исәнлек-саулык теләде.

   Фариз  абыйның  авылдашы, 10-15 яшеннән  фронтка киткән өрлектәй ирләрне  алыштырган  Имамый абый Билалов исә үзенә тиешле бүләкне  алырга өлгерми  калды. Атна-көн элек кенә якты дөньядан  китеп  барган. Медаль аның  улы  Дамирга тапшырылды.

   Тимершык авылыннан Хәниф абый Гарипов та тыл  каһарманнарына булдырылган  Хөкүмәт  бүләген зур горурлык хисләре белән  кабул итте.

“Сугыш  вакытында малай  чагымнан тормыш  арбасына  җигелдем. Җиңү  көнендә  урамда җыйрлап-биеп йөрдек. 1954  елда армиягә китеп, ракета гаскәрләрендә  хезмәт иттем.  Байконурда конструктор Сергей Королевның  кул астында эшләдем.  1957 елның 4 октябрендә Җирнең беренче ясалма иярченен очыруда да өлешем барлыгына горурланам. Мин  ракета тягачында  механик  йөртүче идем, Королев  кушса, янган утка да керә  идек”,– дип сөйләп китте  ул.

Хәниф абый Гарипов колхозда тракторчы булып эшли. Аннары 31  яшендә  гаиләсе белән Ташкентта китеп,  хезмәт юлын 33  ел  механика заводында дәвам итә. 2005 елда 75  яшендә туган  ягына  кайта. Хәзер аның 7 оныгы, 4 оныкчыгы бар.

 “Бу мөһим вакыйганы оештырган һәм анда катнашкан һәркемгә рәхмәт!”, – диде  ветеран медальне  кабул итеп  алганда.

 Юбилей медальләре  барысы 15 бабайга бирелде. 

Менә алар: Салих Габдрахман улы Габдрахманов, Әмин Галәви улы  Галәвиев, Заһидулла Кәлимулла  улы Кәлимуллин (Түбән Шытсу), Мөдәрис Ибәтулла  улы  Ибәтуллин (Юлбат), Шәмсетдин Минһаҗ улы Минһаҗев (Саба), Равил Муса  улы Мусин (Өтернәс), Мөхәррәм Рәкыйп улы Рәкыйпов (Алан-Елга), Миннесабир Шәрифулла  улы Сәмигуллин (Сәрдә), Рәшит Зиннәт  улы Төхвәтуллин (Шәмәрдән), Хәлиулла Фәрхулла улы Фәрхуллин (Татар Икшермәсе), Мөхәмәтгали Нургали  улы Шәвәлиев (Олы Кибәче), Харис Юныс улы  Юнысов (Олы Нырты)

Сугыш  вакытында тылда  эшләгән ветеран апалар Халыкара хатын-кызлар  көне – 8 Март бәйрәме   алдыннан бүләкләнәчәк