КФУ галиме: Җәен зыян сала алырлык табигать күренешләре ешая

Казан федераль университетының метеорология, климатология һәм атмосфера экологиясе кафедрасы мөдире, профессор Юрий Переведенцев җәй айларында өермә һәм давылларның еш күзәтелүе турында сөйләде.

«Соңгы елларда Россия территориясендә куркыныч метеорологик күренешләр ешайды. Җәй айларында зыян сала алырлык табигый күренешләр еш күзәтелә. Ул тенденция үсә бара. Мәсәлән, өем болытлар булганда боз яки көчле яңгыр ява. Күптән түгел генә Сарман районында боз яуды, Арча районында узган өермә нәтиҗәсендә Сабантуй бәйрәме өзелде», — дип сөйләде кафедра мөдире.

Аның сүзләренчә, агачларны машиналар өстенә аударырлык өермә һәм давыллар еш күзәтелә башлады. Климатның үзгәрүе хайваннар дөньясына да тәэсир итә. Галим яңа төр черкиләрнең барлыкка килүен әйтте. 

«Климатның үзгәрүе хайваннар дөньясына да тәэсир итә. Безнең киңлекләрдә Африка черкиләре һәм башка бөҗәкләр барлыкка килде. Без аларга күнекмәгән», — дип сөйләде «Татар-информ» агентлыгында узган матбугат очрашуында Казан федераль университетының метеорология, климатология һәм атмосфера экологиясе кафедрасы мөдире, профессор Юрий Переведенцев.

КФУның Метеорология, климатология һәм атмосфера экологиясе кафедрасы доценты Тимур Әүһәдиев быел черкиләр аз булуын ассызыклады.

«Черкиләр үсеше өчен ике фактор кирәк — җылы һава торышы һәм дым. Җылылык җитә, ә дым җитәрлек күләмдә юк. Черкиләр личинкасы үсеше өчен яңгырдан соң җыелган җыелган күлләвекләр кирәк. Елгалар һәм күлләр аның өчен туры килми, чөнки балыклар ул личинкаларны ашый», — дип аңлатты ул.

Аның сүзләренчә, черкиләрнең аз булуы кошлар өчен начар күренеш.

Фото: Солтан Исхаков

Чыганак: tatar-inform.tatar