Татарстан синоптиклары томан һәм бозлавык турында кисәтә

Иртәгә, 12 ноябрьдә, Татарстан территориясендә, шул исәптән Казанда, урыны белән томан төшәчәк. Төнлә бозлавык булырга мөмкин. Бу хакта Татарстан Гидрометеорология үзәге кисәтә.

Шулай ук урыны белән явым-төшемнәр көтелә, нигездә, сибәли торган яңгыр фаразлана. Көньяктан һәм көньяк-көнбатыштан талгын җил булачак.

Төнлә термометр баганалары -3 градуска кадәр төшәчәк. Көндез һава температурасы +2..+7 градус җылы булачак. Иң җылы һава төбәкнең көньяк-көнбатышында, салкынрагы төньяк – көнчыгышта булачак.

Моннан тыш, төнлә һәм иртән юлларда бозлавык хасил була, дип кисәтә республика синоптиклары.

Фото: архив/Михаил Захаров

Чыганак: tatar-inform.tatar