Һәрвакытта кирәк сез!

автор, 26 октябрь 2020 - 11:29

683

Дөньяда иң мактаулы һәм игелекле һөнәр ияләре кем дип сорасалар, һич икеләнмичә - ак халатлы шәфкать ияләре, дияр идем. Тәүлекнең 24 сәгатендә дә алар безнең сәламәтлек сагында. Хастаханәгә төрлебез төрле хәлдә киләбез, тиешле дәва алгач, Ходай рәхмәте белән үз аякларыбызда сөенеп кайтып китәбез. Табиблар янында эшләүче санитаркалар, җыештыручылар, авырып ятучылар өчен тәмле аш-су әзерләүчеләр дә игелекле эш башкаралар. Хасталанып ятучы кешегә бер кашык су йоттыру да саваплы эш санала.

Моны башкаручылар күпме рәхмәт сүзе ишетәләр. Тән ярасы төзәлә, җан ярасы төзәлми, диләр бит. Олы кешегә күп кирәк мени, кадер-хөрмәт күрсәтелгәч,тәмле сүзләрне җәлләмәгәч, чир дигәне дә тиз чигенә. Үзем дәваланган Шәмәрдән хастаханәсе коллективы турында фәкать мактау сүзләре генә әйтер идем. Саба үзәк хастаханәсе табибларына да бер генә тапкыр мөрәҗәгать итәргә туры килмәде. Һәрвакыт үземә карата ягымлы караш, игътибар тойдым. Әле хәтерлим, быел 22 февраль көнне бәйрәм алдыннан аяк шешеп килдем хастаханәгә. Сызлавына чыдар әмәл юк. Эш сәгате төгәлләнеп килә иде инде. Хирург Ирек Йосыпов аякны карады да, шешнең ярыйсы гына катлаулыгын күреп, “Ничек вакытында килгәнсең, апа”,- дип, мине тиз арада операциягә алып кереп китте. Операция уңышлы узды. Икенче көнне иртә баштан хәлемне белергә кереп җитте Ирек Харис улы. Бәйрәмнән соң ул укырга китте, шуңа да табиб Фәрит Биктов күзәтүе астында дәваланып чыктым. Аллаһка шөкер, аякка бастым. Хәзер шушы игелекле һөнәр ияләренә хәер-дога кылып яшим. Рәхмәт хисләремне шигъри юллар аша җиткерәм:

Авыруга дучар булып,

Калабыз бер чарасыз.

Шул вакытта күңел төшеп

Табибларга барабыз.

Хезмәтегез бик җаваплы,

Тәвәккәл дә, кыю сез.

Өметләрен өзгәннәргә

Яшәү көче бирәсез,

Безнең ише авыруларга

Һәрвакытта кирәк сез!

Мәдинә әбиегез, 84 яшь. Шәмәрдән.

Фото: ru.freepik.com