Икшермәдә атом су асты көймәсенең экипаж әгъзалары белән очрашу булды [фоторепортаж]

19 декабрьдә Икшер­мә кадет-интернат мәктә­бендә Төньяк флотның "Тигр" күпмаксатлы атом су асты көймәсенең экипаж әгъзалары белән очрашу булды. Әлеге чара кадетлар өчен чын мәгънәсендә мавыктыргыч "хәрби-патриотик дәрес"кә әверелде.

Татарстан хәрби хезмәт­кә чакыру комиссиясенең координация советы җа­вап­лы сәркатибе Геор­гий Гатауллин аңлатканча, 1996 елда Төньяк флот­ның "Тигр" атом су асты көймәсе белән Та­тарстан Республикасы арасында шефлык ки­лешүе төзелеп, ныклы хезмәттәшлек элемтәсе урнаштырылган. Шушы юнәлештә яшь буынга патриотик тәрбия бирү, хәрби-диңгез флоты, аның техникалары белән таныштыру максатыннан Төньяк флотның 24нче дивизиясе белән үзара тыгыз бәйләнеш яши. Экипаж әгъзалары очра­шуга бу көннәрдә Казан шифаханәләренең берсендә ял итүләреннән файдаланып килгәннәр иде.

"Тигр" су асты көймәсе экипажы әгъзалары район башкарма комитеты җитәкчесе урынбасары Таһир Шәрәфиев җи­тәкчелегендә иң элек мәктәп-интернатның базасы, кадетларның уку-яшәү шартлары белән таныштылар. Барлыгы 155 кадетны берләштергән белем бирү учреждениесе турында уңай фикерләрен җиткерделәр. Делегация составында корабльнең командиры, "Мужество" ордены белән бүләкләнгән Павел Булгаков кадетларга хәрби-патриотик үрнәкнең чын мисалы булды.

Павел Булгаков әлеге җаваплы һәм серле хезмәт, андагы эш шартлары, кайбер нечкәлекләре хакында сөйләде. Укучыларны кызыксындырган корабль­нең зурлыгын чамалау өчен биш катлы һәм биш подъездлы йортны күз алдына китерергә кирәк икән (озынлыгы -110, биеклеге - 17 метр). Командир әйтүенчә, экипаж 79 кешедән тора, кайбер очракларда 100 кешегә җитә. Төп база Мурманск өлкәсенең Гаджиево шәһә­рен­дә урнашкан. Корабль 7 бүлемле, 60 километр сәгать тизлек белән хәрәкәт итә. Шулай ук заманча булуы, маневрлылыгы белән аерыла. Экипаж көймәдә өскә чыкмыйча су астында 80 тәүлек йөрүгә ирешкән.

Экипаждагы мечманнар­ның берсе Татарстан егете (Тәтеш районы) булуы да кадетларда зур горурлык уятты. Укучылардагы со­рау­ларның күплеге һәм төрлелеге дә әлеге хезмәткә булган кызыксынуларын, серле дөнья белән күпмедер хәбәрдарлыкларын исбатлады. Мәсәлән, коман­дир­ның 200 мең хезмәт хакы алуы, 7,5 елдан лаеклы ялга китүләре, су төбендә дә һәркөн иртән сөтле ботка ашаулары, шо­коладның көндәлек рационга кертелүе, флотта мичманнарның җи­тешмәве дә кадетлар өчен яңалык булды.

Корабль командиры П.Бул­гаков очрашу истә­леге итеп кадет-интернат мәктәбе директоры Роберт Галиәхмәтовка "Тигр" су асты көймәсенең символик медален тапшырды. Кадетлар тарафыннан әзерләнгән хәрби-патриотик характердагы концерт номерлары диңгезчеләр күңеленә хуш килде.

Фәридә Вилданова.