“Ник туганнар авылында”

Спектакльдә җитди проблема күтәрелә. Авылда буйдак егетләр саны күбәйгән. Яңа гаиләләр корылмагач, авылның киләчәге юк. Шушы теманы республика газетасында яктыртырга Энҗе исемле журналист кыз килә. Ул буйдак егетләрнең бар куанычлары хәмер икәнлеген ачыклый. Берсеннән-берсе асыл егетләргә ничек ярдәм итеп була? Әлеге сорауга җавапны Энҗе авылны яшәтергә кайткан агроном егет Райнур белән бергә таба.

Үзешчәннәр Вәлинур Имаметдинов, Илүзә Галимҗанова, Гүзәл Гасыймова, Рәүф Хуҗин, Рафил Алтынбаев һәм Илнур Шәфигуллин рольләрне тамашачы күңеленә барып җитәрлек дәрәҗәдә уйнадылар. Соңыннан үзешчәннәргә Саба муниципаль район башлыгы урынбасары Расих Закирҗанов рәхмәт белдерде, хезмәттә һәм иҗатта зур уңышлар теләде.