Артистлар кышка ничек запас туплый? [+фото]

Эльвира Хамматова: Җәйне зарыгып көтеп алам, ул - иң яраткан ел фасылым. Аллага шөкер, барына да өлгердем. 10 литр каен җиләген шикәр комы белән болгатып, бераз гына төеп, шешәләргә тутырып суыткычка куйдым. Бу очракта җиләкнең 80% файдалы матдәләре саклана. Быел җир җиләген дә туйганчы җыйдым. Әни аптырагач: "Кызым, башка җиләккә барма, куер урын калмады", - диде. Җир җиләген чемләп варенье кайнаттым да, кышка дип кечкенә савытларга тутырдым. Кызыл, ак карлыганнан, кура җиләгеннән, чиядән 30 банка компот яптык. Соңгы арада кыярга керештек, анысы да шактый булып утыра. Кыскасы, җәйге авыл тормышы минеке!

Замирә Рәҗәпова: Әлегә 35 банка компот ясадым. 700 граммлы 10 банка һәм бер 3 литрлы банка карлыган, 3 литрлы банка белән чия вареньесы әзерләдем. Слива җитешкәнен көтәбез. Аннан да компот ясарга исәп. Абрикостан варенье ясау рецептын Лилия Муллагалиевадан сораштым. Төшен ватып, башта кыздырырга, аннан вареньега салып кайнатырга кирәк икән. Әлегә 5-6 банка кыяр тозладым. Алда тагын бер ай бар. Бакчада нәрсә үсә, барысын да тозлыйбыз, кайнатабыз, пешерәбез!

Айгөл Бариева: Карлыган, кура җиләге, викторияне шикәр белән төеп кышка әзерләп куйдым. Чия, кызыл һәм кара карлыганнан 20ләп банка компот яптым. Безнең гаилә өчен җитәрлек, Аллага шөкер! Бик тәмле лечо да ясыйм, әмма анысы соңрак.

Гөлнара Габидуллина: Быел кышка тушенкалар әзерләдем, кыяр тозладым. Чия компоты яптым, абрикос һәм карлыган вареньесы ясадым. Әле җәй тәмамланмады, баклажан икрасы, лечо ясарга, помидор белән кыярны бергә тозларга, помидор белән суган капларга исәп, Алла теләсә. Авылда әтинең зур помидор теплицасы бар. Ул оста итеп томат согы ясый белә. Озакламый бал аертырга җыенабыз. Быел әни дә күп итеп җиләк җыеп, кышка кайнатмалар әзерләгән. Урманга барасы юк, барысы да бакчабызда үсә!

Лилия Муллагалиева: Бүгенге көндә 90 банка компот яптым. Әле тагын бер партия (30-40 банка) әзерләп куярга уйлыйм. Бездә компот күп эчелә, бәйрәмнәрдә дә, икенче көнендә дә. Быел виноград, чия күп булды, авылдан бик күп җиләк китерделәр. Булышырга апам килде, Аллага шөкер. Шушы көннәрдә слива, абрикостан кайнатмалар әзерләдем. Кыяр, борыч тозлыйсым, салатлар ясыйсым бар. Кышка запас туплау төгәлләнмәде әле.

Люция Мусина: Кыяр маринадладым. Карлыган һәм кура җиләгеннән варенье кайнаттым. Ничә банка әзерләгәнемне санамадым. Җир җиләген кайнатмыйча гына, шикәр белән болгатып суыткычка куйдым. Кышка менә дигән кайнатма була ул! Компот ябарга да исәп бар, Алла боерса. Анысына әле җитешмәдем.

Эльвира ШАКИРОВА
Интертат.ру