Авыл бәйрәменнән – милли брендка. “Каравон“ нәрсә белән истә калды?

Әлеге төрле төсләргә һәм җыр-биюгә бай булган бә­й­рәмдә Россия төбәкләреннән һәм республика районнарыннан 140 фольклор коллективы һәм ансамбле катнашты. Бәй­рәм чараларына барлыгы 2 меңгә якын кеше үз өлешен кертте. Башка еллардан аермалы буларак, быел мәйданда кунакларның күңелен урам музыкантлары белән курчак театры күрде. Һөнәрчеләр шә­­һәрендә исә 320 декора­тив-гамәли сәнгать мастерлары үз эшләрен тәкъдим иткән иде. Чүлмәк ясау һәм токарьлык эше, тукыма туку, төрле кул эшләнмәләре урнаштырылган мәйданчыклар эшлә­де.

Мәсәлән, Лаеш районы­ның Столбище авылыннан кил­гән Хәмит Нуров халыкка агач эшләнмәләре тәкъдим ит­те. Останың кул җылысы кергән әйберләр арасында сувенирлар, сумкалар, салфетка, ачкыч урнаштыру җай­ланмалары, савытлар бар иде.  

– Мин программист булып эшлим. Ә бу эшем – хобби. Махсус кибетләребез булмаса да, әледән-әле менә шулай ярминкәләрдә катнашырга чакырып торалар, – ди ул.

Шулай ук бәйрәмдә так­мак­лар әйтү “батл”ында катнашырга, авыл экспедиция­сендә булырга, фольклор музыкаль традицияләре белән дә танышырга мөмкин иде.     

Бәйрәм кунаклары арасында Татарстан Дәүләт Советы рәисе Фәрит Мөхәммәт­шин бар иде. Халык һөнәр­челеге ярминкәләрен караганда  Владимир өлкәсеннән килгән оста Евгений Анорин аңа тузга яндыру ысулы белән язылган эшләнмә бүләк итте. Сүз уңаеннан, берничә ел элек аның эшләре белән Татарстан Президенты Рөстәм Миң­неханов та кызыксынган булган. 

– Без гадәти авыл бәйрә­менең Бөтенроссия рус фольклоры фестиваленә әйләнүе белән горурланабыз. Аны барыбыз да яратабыз һәм көтеп алабыз. “Каравон” республи­ка­бызның мәдәни брендына әйләнде. Аның чикләре елдан-ел киңәя, – диде фестиваль ачылышында Лаеш районы башлыгы Михаил Афанасьев.

Район башлыгы “Өч халык – бер юл” дип аталган этник маршрут эшләнгәнлеген һәм аның нәкъ менә Никольское авылыннан башлануын  җит­керде.  

Шуннан соң кунакларны Фәрит Мөхәммәтшин котлады һәм бәйрәмнең төрле милләт, дин вәкилләрен бер­ләштерүен билгеләп узды.

– Фестиваль елдан-ел талантлы үзешчән һәм профессиональ фольклор коллективларын һәм башкаручы­лар­ны җыя. Мондый бәйрәм­нәр безнең күп милләтле халкыбызны берләштерә. Тарихилык саклана, шул ук вакытта яңалык та кертелә, – диде ул.

Дәүләт Советы рәисе шулай ук рус халкының гореф-гадәтләрен, мәдәният һәм йолаларын саклап калуда Татар­станның һәм Лаеш районы­ның өлеше зур булуын бил­геләп узды. Һәм Татарстан Президентының сәлам хатын җиткерде.

Бәйрәмдә мәдәният өлкә­сендә аеруча зур тырышлык күрсәткән, фестиваль тормышында тирән эз калдырган иҗат коллективларына, аерым шәхесләргә дәүләт бү­ләк­ләре, 300 – 500 мең сумлык сер­тификатлар тапшырдылар. Иң зур бүләкне – 500 мең сумлык сертификатны  В. Птич­ки­на исемендәге рус халык хоры Казанга алып китте. Аның җитәкчесе Лариса Кречетова безгә әйтүенчә, 25 кеше йөри торган хор коллективы моны 30 еллык юбилейларына зур бүләк буларак кабул иткән.

– Бу безнең өчен һич көт­мәгән зур бүләк булды. Бик шатландык. Әлеге акчага сәх­нә костюмнары тектерергә планлаштырабыз, – диде ул.

Бәйрәм әнә шулай яхшы кәефкә дә, бүләкләргә дә, матур теләкләргә дә бай булды. Соңыннан журналистлар бе­лән аралашкан вакытта Фәрит Мөхәммәтшин:

– Тормышны законнарга, норматив документларга, Конс­титуциягә генә дә корып булыр иде, ләкин һәр халык­ның кече Ватанын, мил­лә­тен, телен үзенчә аң­лау бар. Тра­ди­цияләрдә буыннан буынга күчеш саклана. Аннан башка халыкның киләчәге юк, – диде.   

Фото: http://www.vatantat.ru
http://www.vatantat.ru