Ипи шүрлектә ятмый
Сата белмәгәч, алып тормаска иде. Депутатлар сатылмый калган ризыкны кире җитештерүчегә кайтаруны тыю турында закон проекты әзерләгән. Әмма берьюлы ике оешма – Икътисадый үсеш, Сәүдә һәм сәнәгать министрлыклары бу фикергә каршы чыкты. Түрәләр әйтүенчә, бу мәсьәләне яхшылап тикшерергә кирәк.
Сәүдә һәм сәнәгать министрлыгының департамент директоры урынбасары Никита Кузнецов әйтүенчә, бу мәсьәлә буенча 52 төбәкнең фикерен белешкәннәр. Яклаучылар да, каршы чыгучылар да бертигез булган. Зур кондитер фабрикасының берсендә идарәче булып эшләүче Сергей Сурмач мондый закон проектының бик тә кирәк булуын белдерә. “Без хәзер товарны кире кайтармаска риза булган эре сәүдә челтәрләре белән генә эшләргә тырышабыз, – ди ул. – Ә менә җитештергәнне кире үзебезгә бирүчеләр белән элемтәне өздек. Кызганыч, шушы хәлләрдән соң товар әйләнеше 70 процентка төште. Ләкин шунысы бар: җитештергәнне 40 процентка кадәр кире кайтару тагын да зуррак югалтулар китерә. Моңа кадәр кире килгән ризыкны юк итәргә мәҗбүр булдык. Чөнки составында май булган торт, пирожныйларны берничек тә кабат эшкәртеп булмый. Шуңа күрә югалтуларга юл куймыйча эшләвең хәерлерәк”.
Сергей Сурмач сүзләреннән аңлашылганча, Европа илләрендә сатылмаган ризыкны кире кайтару дигән нәрсә гомумән юк икән. Зур сәүдә челтәрләрендә махсус программалар урнаштырылган, сатып алучыларның ихтыяҗын исәпкә алып, җитештерүчеләргә нинди заказ җибәрүне көйләп торалар. Хәер, Россия сәүдәгәрләре өчен мондый төгәллек кирәкми дә. Алар үзләренә беркайчан да зыянга эшләми бит.
– Бу сорауга берничек тә берьяклы гына җавап бирергә ярамый, – ди икмәкханәдә эшләүче Ирина Гаврилова. – Һәр ризыкның саклану вакыты бар, ипине берничек тә киштәдә озак яткырып булмый. Сәүдә турындагы федераль законга кайбер үзгәрешләр кертергә кирәктер, әмма бөтен якны уйлап эш итәргә кирәк. Монда җитештерүчеләрнең дә, сәүдәгәрләрнең дә, сатып алучыларның да мәнфәгате якланса яхшы булыр иде. Сатучы белән җитештерүченең бер-берсен аңлап эшләве кирәк. Алар ризыкны кире кайтара икән, аның урынына икенчесен алсын.
Ул эшли торган икмәкханә күп күләмдә ипи пешерми. Халык ихтыяҗыннан чыгып эш итә. “Безнең белән эшләүче кибетләр күпме сатылганын белә, шуннан чыгып кирәген генә алалар. Кире кайтару да бик аз. Күп күләмдә, эре сәүдә үзәкләре белән эшләүчеләргә кыенрактыр. Бездә бөтен нәрсә җирлек халкының мәнфәгатеннән чыгып эшләнә”, – ди ул.
Следите за самым важным и интересным в Telegram-каналеТатмедиа
Нет комментариев