Кайбер һөнәрне аңлап бетермиләр

Россия Мәгариф  һәм фән министрлыгы үткәргән сораштыру нәтиҗәләренә караганда, чыгарылыш уку­чыларының 30 проценты математика, инженер юнә­лешен сайларга җыенуын әйткән. Язмышларын гуманитар фәннәр, медицина өлкәсе белән бәйләргә теләүчеләр дә аз түгел. Ә менә авыл хуҗалыгы, укытучы эше азрак кызыксындыра икән. Сораштыруда барлыгы 5 мең кеше катнашкан.

 
– Хәзерге вакытта барлыгы сигез меңнән артык гариза кабул иттек. Бер меңнән артык бюджет урыны булса, шуның кадәр үк абитуриент документ­лары­ның төп нөсхәсен (оригиналын) тапшырды инде.  Дө­рес, былтыр бу вакытта гаризалар саны күбрәк иде. Әле вакыт бар, барысы да өлгерер, – ди Казан илкүләм тикшеренүләр техник университетындагы (КАИ) кабул итү комиссиясенең җаваплы сәркатибе Роман Моисеев. – Килүчеләр саны бераз  кимрәк булса да,  узган ел белән чагыштырганда, безгә югарырак баллы абитуриентлар килә. Шуңа күрә кайбер белгеч­лекләр буенча керү баллын күтәрергә уйлыйбыз. БДИдан 100 баллны биш кеше җыйган. Абитуриентларны бигрәк тә лазер техникасы, авиатөзелеш, проектлаштыру, мәгълүмат техноло­гияләре, радио юнәлешлә­ре кызыксындыра.  Укудагы казанышлар өчен ун баллга кадәр өстәмә балл бирәбез. Әйтик, волонтерларга – 4, ГТО буенча  3 балл өстәлә.

Казан илкүләм технология тикшеренүләр университетында (КХТИ) бакалавр, специалитет юнәлешлә­ренә 1337 бюджет урыны бүлеп бирелгән. Бүген 13 меңнән артык гариза кабул ителгән. 1400 кеше доку­ментларының төп нөсхәсен китергән. Алар кем буласын төгәл ачыклаган дигән сүз бу. Дизайн,  автоматлаштыру һәм идарә, химик тех­нологияләр, наноматериаллар һәм технология­ләр,  каучук һәм эластомер эш­кәртү һәм технологияләр факультетлары популяр.

Казан дәүләт ветеринария медицинасы академия­се­нең җаваплы сәркатибе Рубин Каюмов әйтүенчә, вузда бюджет урыннары шул килеш сакланган. Көн­дезге һәм читтән торып уку бүлегендә 320 урын бар. Хәзерге вакытта меңгә якын  егет һәм кыз гариза тапшырган. “Абитуриент­ларның күбесе мал табибы булырга омтыла. Бигрәк тә шәһәр, район үзәкләрендә әлеге белгечләргә ихтыяҗ  көннән-көн арта бара. Казандагы кайбер урамнарда хәзер хәтта 2-3әр  лаборатория бар. Хезмәт хаклары да яхшы. Татар халкында әти-әни киңәшенә колак салу дигән нәрсә бар. Аби­туриентларның күбесе алар­ның фикере белән исәпләшә, – ди Рубин әфән­де. – Әмма, кызганыч, зоотехник һө­нәренең асылын бик аңлап бетермиләр әле. Авыл таркала бара, кирәге чыкмас дип, башка һөнәр сайларга тырышалар. Шуңа күрә зоотехник исемен үз­гәртергә кирәктер дип уйлыйм. Әйтик, белгечлекне җи­тештерү буенча технолог яки менеджер дип атарга мөмкин. Безгә килүче абитуриентларның яртысы – чит төбәкләрдән. Анда уку йортының дипломы югары бәяләнә, диләр.  Академия­дә укыр өчен барлык мөм­кинлекләр дә бар. Керү балларын арттырырга уйламыйбыз”.

КФУ, иң сәләтле яшь­ләрне җәлеп итү өчен, яңа төр стипендия уйлап тапкан.  Олимпиадаларда җи­ңү­че­ләргә, БДИда йөз балл туп­лау­чыларга 100 мең сумга кадәр акча түләргә җыена. “Акыллыбаш”лар д­и­гәндә, билгеле булганча, КФУга 13 яшьлек Лина Мө­хәм­мәтҗа­нова да документ тапшырган. Ул Казанның 122 нче гимназиясендә укып, соңгы елда читтән торып, Санкт-Петербургтагы мәга­риф үзәген тәмамлаган.  КФУ тарихында бу – икенче очрак.

Нурлат районының Колбай-Мораса авы­лын­да яшәүче Мария Матвеева документларын КФУның татар теле юнә­лешенә биргән. Урыс мил­ләтеннән булган кыз турында күптән түгел  газетабызда да язып чыккан идек. “КФУда бер урынга 5-10 кеше дәгъва кыла. Өстәмә төрек яки инглиз теле укытучысы белгечлеген дә алырга мөмкин. Бәйге зур булгач, документларымны, аптырап, Казан ин­новацияләр университетына да  тапшырдым. Татар теле укытучысы булу теләгем акланмаса,  дәүләт хезмәт­кәре яки юристлыкка түләп укырга туры киләчәк”, – ди Маша.

Фото: http://www.vatantat.ru
http://www.vatantat.ru