Казаннарга тагын киләм әле
Зак Мельберг Американың Мичиган штатындагы кечкенә генә Ладингтон шәһәрендә яши. Россия белән танышасы килеп кунакка килгән ул. Казан халкын аеруча яраттым, биредә ачык йөзле кешеләр яши икән, ди егет.
Чит илләрдә, гадәттә, Россиядә урыслар гына яши дип уйлыйлар. Башкалардан аермалы буларак, ул татарлар барлыгын алдан белгән. Узган ел Татарстаннан өч егет-кыз алар шәһәренә барган булган. Менә шунда якыннан танышып китәләр. ”Татар милләте турында беләм мин, кунакка бер кайтып, күреп китәрмен әле”, – ди ул аларга. Сүзендә тора да.
– Россия белән танышуны Мәскәүдән башладым, – ди Зак. – Яшермим, беренче мәлдә бик ошап бетмәде. Мәскәүләр белән аралашу бик кыен, алар синең соравыңа теләр-теләмәс җавап бирә. Ә менә Казан мине бөтенләй башкача каршы алды. Монда халык ачык йөзле. Казаннан соң Санкт-Петербургка бармакчы булам.
Зак Казанның күп кенә урыннарында булган. Кремлегез бигрәк тә күңелемә хуш килде, ди. Туристлар өчен бик күп мөмкинлекләр барлыгын да әйтә. Кукмарага да барып килгән. “Кечкенәрәк кенә шәһәр. Анда тау бар икән, рәхәтләнеп шудык, шулкадәр ошады. Бик кунакчыллар. Мантый, пилмән белән сыйладылар”, – ди егет.
Аңа безнең милли ризыкларыбыз да ошаган. “Иң тәмле ризык – өчпочмак. Ашап туя торган түгел. Кая гына керсәм дә, шуны сатып алам. Гөбәдиягезне дә үз иттем. Өлеш тә ашап карадым. Күп әйбердән авыз иттем инде. Исемнәре хәтеремдә дә калмады”, – ди егет.
Ул көзгә кабат Казанга килергә җыена. Бу юлы үзе генә түгел, дуслары белән. Дусларын да өчпочмак белән кызыктырган. Казанда юкка гына өчпочмакка һәйкәл куймаганнар икән, туристларны җәлеп итүнең бер юлы булган бит бу...
– Һөнәрем буенча пешекче мин, ресторанда эшлим. Татар ризыкларын пешерергә өйрәнер өчен махсус килергә җыенам. Сезнең нинди ризыклар ашаганны Америкада да белсеннәр әле, – ди Зак.
Россиягә килергә уйлагач, берничә авыз сүз урысча да өйрәнгән булган. Сүз арасында “спасибо”, “очень приятно”, “здравствуйте”, “до свидания” дип кыстырып та куя. “Татарча өйрәнәсе калган икән дим, икенче килешкә татарча өйрәнәм, “рәхмәт”, “исәнмесез” дигәннәрен беләм инде”, – ди.
Россиянең кай ягы ошамаганмы? Юллар... Машиналарның кагыйдәләрне бозып, куркыныч йөрүе. Без аның белән Казанның бер бистәсенә бардык. Безнең юлларны үзегез беләсез, чокыр-чакырлы, аеруча кар эрегән вакытта. Бер машина чокырга эләкмәс өчен каршы якка чыкты да кабат үз юлына кайтты. Зак куркуыннан кычкырып җибәрде. Ә без мондый хәлләргә ияләнгән инде...
Олы юлдан урамга кергәч тә, чокырлы юллар буйлап машинаның көчкә идарә ителүенә аптырады егет. Монда гел шундый хәлме, дип тә сорады әле. Ачык чырай, тәмле сый янына яхшы юлы да кирәк шул.
Фото: http://www.vatantat.ru
Следите за самым важным и интересным в Telegram-каналеТатмедиа
Нет комментариев