Хәзер сулар яшелләнми
Быелгы санитар-экологик икеайлык нәтиҗәләре буенча Казан, Әлмәт һәм Сарман районнары алдынгылар булып танылды. Аларны Татарстан Президенты Рөстәм Миңнеханов котлады. Республикада 1 апрельдә башланган чистарту икеайлыгы тәмамланды. “Әмма бу акция бетте дип кулны кушырып утырып булмый, эшләнәсе эшләр байтак”, – ди республика экологлары.
– Икеайлык барышында барлыгы 6 мең 100 хокук бозу очрагы ачыкланды, 19 млн 422 мең сумлык штраф салынды. Апрельдән башлап май аена кадәр республика территориясендә калдыкларны законсыз урнаштыруның 1 мең 693 урыны ачыкланды, икеайлык азагына шуның 1 мең 592се бетерелде, – дип хисап тотты Татарстанның экология һәм табигый ресурслар министры Александр Шадриков.
Икеайлыкта барлыгы 1 млн 170 мең кеше катнашкан. Министрлыкка экология мәсьәләләренә кагылышлы 2 мең 300дән артык мөрәҗәгать килгән, шуның 85 процентын хәл иткәннәр. “Калган мөрәҗәгатьләр буенча әле дә эшләр дәвам итә. Чистарту икеайлыгы кысаларында республикада 400 мең тирәсе агач һәм куак утыртылды, полигоннарга 406 мең куб метр калдык чыгарылды. Балалар өчен уен мәйданнары, тукталыш павильоннары тәртипкә китерелде, – ди министр. – “Экояз – 2018” бәйгесенә нәтиҗә ясаганда, табигатьне яратучы актив кешеләрнең күплегенә тагын бер кат инандык. Аеруча балалар бакчасына йөрүчеләрнең эшләрен сайлап алу җиңел булмады. Барысы да тырышкан. Мәктәпләр дә, югары уку йортлары да калышмый. Табигатьне яраткан барлык катнашучыларга рәхмәттән башка сүз юк!”
Экологлар өчен “урак өсте” дәвам итә. Анысы футбол буенча дөнья чемпионатына бәйле. “Икеайлык барышында атмосфера һавасының һәм су объектларының сыйфатын бәяләүдә төрле алымнар кулланылды. Керергә авыр булган чүпләнгән урыннар очкыч ярдәмендә тикшерелде, – диде Шадриков. – Чемпионат барышында 5 күчмә лаборатория һәм 5 кече судно күзәтү уздырачак. Чемпионат беткәнче Казансу яры буенда тәүлек буе күчмә лаборатория эшләячәк”.
Кичә, чемпионатның беренче көнендә, экологлар Казансу һәм Идел елгаларын тагын бер кат тикшереп кайтты.
– Су составын һәрдаим тикшереп торачакбыз. Казанга спортчылар гына түгел, кунаклар да күп килде бит. Су коенып булмаса да, елга буйларындагы матурлыкны карап йөрерләр дип уйлыйбыз. Шуңа күрә судан бернинди начар ис килмәсен дип тырышабыз. Су объектларын гына түгел, һаваның чисталыгын да контрольдә тотабыз, – ди экология һәм табигый ресурслар министры урынбасары Фаяз Шакиров. – Быел һава торышының салкынча булуы сулыклар өчен уңай. Соңгы елларда эре оешмаларның да экологиягә карашы үзгәрде. Күбесе чистарту корылмаларына өстенлек бирә. Шунлыктан әлегә суга пычрак агызучылар юк.
Фото: http://vatantat.ru
Следите за самым важным и интересным в Telegram-каналеТатмедиа
Нет комментариев