Пенсионер кибеттә 700 мең сумын онытып калдырган

Корзина төбенә акча һәм документлар тутырылган папкаларын салганнар, аның өстенә азык-төлек. Кассада акча түләгәч, азык-төлекне пакетларга тутырганнар, ә папка корзинда калган. Өйгә кайтып бер сәгатьтән соң гына папканың юклыгын аңлап, кибеткә килгәннәр. Онытып калдырылган әйберне кибеткә тапшырылмаганлыгын белгәч, алар полициягә мөрәҗәгать итә. Видеокүзәтү папканы бер хатын алганын күрсәтә. Бу хәл Мәскәүдә була. Хатынның шәхесен ачыклау мөмкин булмаганлыктан, пенсионерлар кәефләре кырылып өйләренә кайталар. Төнлә белән пенсионер ирнең кәрәзле телефоны шалтырый. Папканы табучы булып чыга ул. Ярый әле документларда кәрәзле телефон да язылган була. Шулай итеп пенсионерларга папкалары кире кайтарыла. Менә дигән Яңа ел бүләге була бу.

http://almet-rt.ru