Саба таңнары
  • Тат Рус Лат
  • Шәһәр уртасында... «Каз өмәсе!»

    Сургут шәһәре «Ак калфак» оешмасы татар хатын-кызлары милләттәшләребезне, дусларыбызны халкыбызның онытылып барган матур бәйрәме – «Каз өмәсе» йоласы белән таныштырды.

    Вакыт дигәнең бик тиз уза. Ямьле җәйләрдән соң, алтын көзләр үтте, ап-ак кышлар җитте. Сургутта каз өмәсен гөрләтер вакытны зур түземсезлек белән көттеләр. 



    – Казлар таптым. Әйдә, «Каз өмәсе» бәйрәмен ясыйк, балачакка бер кайтып килик, Гөлчәчәк, – дип сөенечле тавыш белән телефоннан шалтыратты Нурия ханым. – Сәгать унга килегез! Бөтенесен чакыр. Без Гөлсинә белән барын да әзерләп куйдык: чиләк, көянтәләр... Дания апаң чәйгә тәмнүшкәләр пешерәм диде. Нурания апаң каз коймагы пешереп күрсәтәм диде. Ә син без яраткан кош телеңне пешереп алып кил. Фидан хәзрәт догалар укып башлап җибәрергә ризалашты.


     
    Бу матур бәйрәмне әллә күптән күрмәгәнгә, әллә читтә яшәп туган якларны сагынганга, ике дә уйлап тормыйча, бер тавыштан кызлар белән «киләбез» дидек. 



    Урамда салкын кыш. Әмма беребез дә соңга калмыйча бәйрәмгә ашыктык. Эшне Фидан хәзрәт бисмиллалы изге догалар белән башлап җибәрде. Кызларыбыз түгәрәкләнеп утырып, бер-берсенең хәл-әхвәлләрен сорашып алганнан соң, халкыбызның борынгы җырларын җырлый-җырлый, үткәннәрне искә төшереп каз йолкырга кереште. Бу көнне хәркем үз урынында иде. Берәүләр каз йолыкса, икенчеләр табын әзерләде, коймак кыздырды, каз муеныннан, баш-аякларыннан телеңне йотарлык итеп өйрәле аш пешерде. Егетләребезгә дә эш табылды. Самавыр кайнатырга, йолкыган казларны эләргә, гармун тартып тирә-якка татар моңын тарату аларга йөкләнде. Каз йолкып, баш аякларны чистартып, чәйләп алганнан соң, кызларыбыз шәһәр буйлап барасы бар дип тормады, биек катлы йортларны үтеп, Обь елгасына казлар юарга, каз каурыйларын чәчеп кайтырга юл алды. Казлар юып, бәке буенда уен уйнап, җырлап-биеп арыганнан соң, өйгә кайтып, казларны урнаштырып, бергәләп түгәрәк өстәл артында ашка җыелдылар. Бик күңелле булды!
    Дөрес, сургутлылар атна саен мондый бәйрәмнәрне оештырып тора. Сургут шәһәрендә «Ак калфак» җәмгыяте оешу, Сургут шәһәре иҗтимагый татар милли-мәдәни оешмасының шәһәрдә бик актив эш алып баруы, бу инде халкыбызның йолалары, гореф-гадәтләре онытылмасын, яшьләребезгә үрнәк булсын, халыкны тагын да ныграк берләштерсен дип куелган олы максатларны чынга ашыру. Шөкер, бар эшне башлап йөрүче Нурия ханым кебекләр, мөхтәрият җитәкчеләре Р. Ульбеков, Риф Садыйков кебек чын татар җанлы егетләребез булганда мондый йолалар, бәйрәмнәр озак сакланыр! 

    Гөлчәчәк ФӘТХУЛОВА, 
    Сургут шәһәре. 

    http://syuyumbike.ru

    Нравится
    Поделиться:
    Реклама
    Комментарии (0)
    Осталось символов: